Prezıdent ǵalymdardy kásibı merekesimen quttyqtady
Qazaqstan Prezıdenti Qasym-Jomart Toqaev Ǵylym kúni qarsańynda elimizdiń ǵylym salasynda qyzmet etip júrgen ǵalymdarmen kezdesip, kásibı merekemen quttyqtady. Memleket basshysy ǵylymǵa degen memlekettiń senimi men qoldaýyn erekshe atap ótti.
Prezıdent óz sózinde ǵylym jolyndaǵy qıyndyqtarǵa tek tabandy, eńbekqor, jańashyl ári óz isine adal adamdar ǵana shydaı alatynyn basa aıtty. Qazirgi tehnologıa dáýirinde úzdiksiz izdenis pen tereń bilimniń mańyzy arta túskenin atap ótti.
Ǵylym akademıasy jańǵyrtylyp, zańnamalyq qoldaý kúsheıdi
Prezıdent úsh jyl buryn bergen tapsyrma negizinde Ulttyq Ǵylym akademıasyn jańǵyrtýǵa baǵyttalǵan aýqymdy jumystar atqarylǵanyn jetkizdi. Akademıa joǵary ǵylymı uıym mártebesine ıe bolyp, ınfraqurylym jańartylyp, kadr daıarlaý júıesi jolǵa qoıylǵan. Byltyr qabyldanǵan «Ǵylym jáne tehnologıalyq saıasat týraly» zańy ǵylymı ekojúıeniń damýyna tyń serpin bergen.
Ǵylymǵa qarjylaı qoldaý – rekordtyq deńgeıde
Prezıdent málim etkendeı, sońǵy jyldary ulttyq ǵylymǵa bólinetin qarjy 3,5 ese artty. Bul – jas zertteýshilerge jasalyp otyrǵan zor qoldaýdyń aıqyn dáleli. Búginde elimizde 25 myńnan astam ǵalym eńbek etse, olardyń jartysy – 40 jasqa tolmaǵan jas mamandar. Bul óz kezeginde ǵylymdaǵy jańa býynnyń qalyptasyp kele jatqanyn kórsetedi.
Atom energıasy – bolashaqtyń kilti
Prezıdent atom energıasy tek turaqty energıa kózi emes, sonymen qatar ekonomıkanyń jańa baǵyttaryn damytýǵa jol ashatyn strategıalyq sala ekenin aıtty. Osyǵan oraı, Prezıdent janyndaǵy Ǵylym jáne tehnıka jónindegi ulttyq keńestiń aldaǵy otyrysynda atom energetıkasyn damytý basty taqyryp bolmaq.
Jasandy ıntellekt pen İT salasy – basym baǵyttar qatarynda
Memleket basshysy İT mamandaryn daıarlaýǵa erekshe nazar aýdaryp, oqýshylar men stýdentterge jasandy ıntellekt daǵdylaryn úıretý qajettigin aıtty. Sondaı-aq, ǵylymnyń júıeli damýy úshin memleket pen bıznes, ýnıversıtetter men ǵylymı ortalyqtar arasyndaǵy baılanysty nyǵaıtý kerek ekenin eskertti.
Ǵylymı uıymdardyń ekonomıkalyq úlesi artyp keledi
Sońǵy bes jylda qoldanbaly zertteýlermen aınalysatyn uıymdardyń kirisi 40 mlrd teńgeden asty, al 10 mlrd teńgeden astam salyq memleket qazynasyna tústi. Ǵylym salasyna 14,5 mlrd teńge jeke ınvestısıa tartylyp, 2 myńnan astam jumys orny ashylǵan. Bul – ǵylymnyń tek teorıalyq emes, praktıkalyq turǵydan da el damýyna úles qosyp jatqanyn bildiredi.
Zertteý ýnıversıtetteri – ǵylym tiregi
Qazirgi tańda Qazaqstanda zertteý ýnıversıteti mártebesine laıyq 10 oqý orny bar. Alaıda Prezıdent bul jetkiliksiz ekenin, ǵylymı áleýetti arttyrý úshin zertteý ýnıversıtetteriniń sanyn kóbeıtip, olardyń áleýetin kúsheıtý qajettigin jetkizdi. Mysal retinde Satbayev University zertteýshileriniń jumysyn atap ótti.
Prezıdenttiń aıtýynsha, búginde ǵylym qaıtadan tórge shyǵyp otyr. Bul – memlekettiń adal, kásibı jáne jańashyl ǵalymdarǵa degen senimi men úmitiniń belgisi. Ǵylymǵa jasalǵan mundaı jan-jaqty qoldaý Qazaqstannyń ıntellektýaldyq damýyna, tehnologıalyq serpilisine jáne strategıalyq turaqtylyǵyna kepil bolmaq.