Energetıka mınıstrligi Atom energetıkasy jáne ónerkásibi departamentiniń dırektory Ǵumar Serǵazınniń aıtýynsha, Qazaqstanda AES salý ýaqyty áldeqashan jetken.
"Bizge negizi AES-ti baıaǵyda-aq salý kerek edi. Endi salmaý kúná", – dep ol MAGATE uıymynyń mamandarynyń pikirine súıene otyryp málimdedi.
Serǵazınniń aıtýynsha, AES salýǵa barlyq alǵysharttar bar: shıkizat qory jetkilikti, óndiris joǵary deńgeıde damyǵan, ǵylymı áleýetimiz kóptegen damyǵan elderden alda. Eger AES salý týraly sheshim qabyldansa, Qazaqstannyń energetıkalyq jetistigi odan ári damı túsetinine senimdi. Úmitker tórt kompanıanyń bireýimen kelisimge qol qoıylsa, aldaǵy on jylda qazaqstandyq mamandar sheteldik atom elektr stansıalarynda tájirıbe jınaqtaıtyn bolady.
"Men ózim Ońtústik Koreıa, AQSH, Belorýs syndy elderdiń atom stansıalarynda boldym. Ekskýrsıa kezinde olardyń tarıhymen tanysyp, AES ornalasqan jerdegi aýyldardyń keıin úlken qalalarǵa aınalǵanyn kórdim. Sol sıaqty erteń Úlken aýyly da úlken qalaǵa aınalaryna kúmánim joq", – dedi Ǵumar Serǵazın.