Almatyda Haval kóliginiń júrgizýshisi qarsy baǵytta kele jatqan jeńil avtokólikti soǵyp, keıin polısıadan qashýǵa árekettengen, dep habarlaıdy Aqshamnews.kz tilshisi.
Áleýmettik jelide taraǵan vıdeony Almaty qalalyq Polısıa departamenti resmı túrde rastady. Vedomstvo málimetinshe, oqıǵa 24 qańtarda saǵat 23:06 shamasynda Tımırázev kóshesinde bolǵan. Túngi tynyshtyqty kúzetý barysynda polısıa qyzmetkerleri bordúrge soǵylǵan Haval kóligin baıqap, toqtatý týraly zańdy talap qoıǵanymen, júrgizýshi baǵynbaı, qozǵalysyn jalǵastyryp ketken.
Qýǵyn kezinde Jarokov pen Ótepov kósheleriniń qıylysynda atalǵan kólik basqa avtokólikpen soqtyǵysqan. Jol-kólik oqıǵasynan keıin de júrgizýshi oqıǵa ornynan ketpek bolǵanymen, polıseıler ony ustap úlgergen. Tekserý barysynda júrgizýshiden alkogóldik masańdyq belgileri anyqtalǵan.
Polısıanyń habarlaýynsha, júrgizýshi — shetel azamaty. Oǵan qatysty birneshe ákimshilik quqyq buzýshylyq boıynsha materıaldar rásimdelgen: mas kúıinde kólik basqarý, polısıa talabyna baǵynbaý jáne jol-kólik oqıǵasyn jasaý.
Ákimshilik sot sheshimimen quqyq buzýshy 20 táýlikke ákimshilik qamaýǵa alynyp, 7 jylǵa kólik basqarý quqyǵynan aıyrylǵan. Kólik arnaıy aıyp turaǵyna qoıyldy. Polısıa departamenti mas kúıinde kólik júrgizý men quqyq qorǵaýdan qashý áreketteri jol qozǵalysyna qatysýshylardyń ómiri men densaýlyǵyna tikeleı qaýip tóndiretinin eskertti.