2 altyn, 5 kúmis jáne 2 qola medalǵa qol jetkizdi.
Mońǵolıa astanasy Ulan-Bator qalasynda grek-rım kúresinen Azıa chempıonaty aıaqtaldy. Qurlyq birinshiligine Qazaqstan sapynan 10 sportshy qatysyp, onyń 9-y jeńis tuǵyrynan kórindi, dep habarlaıdy Almaty-akshamy.kz Olympic.kz citeme jasap.
Atap aıtqanda, grek-rım kúresiniń sheberleri 2 altyn, 5 kúmis jáne 2 qola medalǵa qol jetkizdi. Sondaı-aq, grek-rım kúresinen Qazaqstan quramasy upaı sany boıynsha jalpykomandalyq esepte Azıa chempıonatynda kósh bastady. Eki kúnge sozylǵan jarys qorytyndysy boıynsha "klasıkter" barlyǵy 180 upaıǵa ıe bolǵan. Iran quramasy ekinshi bolsa, Qyrǵyzstan balýandary úzdik úshtikti túıindedi.
Qazaqstan qorjynyna alǵashqy altyndy 130 kelide beldesken Álimhan Syzdyqov saldy. Ol fınalda Ońtústik Koreıa sportshysy Kım Mınsokty taza jeńispen utty.
Jarysqa shırek fınalda qosylǵan ol Roman Kımdi, jartylaı fınalda japonıalyq Arato Sonadadan aılasyn asyrǵan bolatyn.
Sensasıaǵa balanǵan jeńis
Jarystyń ekinshi kúninde Meıirjan Shermahanbet ádemi kúres kórsetip, 67 keli salmaq dárejesinde qarsylas shaq keltirmedi. Fınalda eki dúrkin álem chempıony, eki dúrkin Azıa oıyndarynyń chempıony, eki dúrkin Azıa chempıony Rú Han Sýdy (Ońtústik Koreıa) kilemge eki ret alyp uryp, ýaqytynan buryn 11:3 esebimen jeńiske jetti.
Bes balýanda - bes kúmis
Jeńil salmaqta synǵa túsken Amanǵalı Bekbolatov fınalda japonıalyq Iý Shıotanımen beldesti. Ekeýara kezdesý 13:2 esebimen japonıalyq balýannyń enshisine sheshildi.
Ulan-Bator bozkileminde Mırambek Aınaǵulov Azıa chempıonatynyń eki dúrkin kúmis júldegeri atandy. 63 keliniń altynyn sarapqa salǵan otandasymyzdy sheshýshi beldesýde Tynar Sharshenbekov toqtatty.
77 kelide Maqsat Erejepov qyrǵyzstannyń ataqty balýany, Olımpıada oıyndarynyń kúmis júldegeri Aqjol Mahmudovpen beldesti. Aqtyq kezeńde qazaqstandyq sportshy 3:1 esebimen qarsylasynan jeńilip qalyp, qurama qorjynyna úshinshi kúmisti ákeldi.
Kúmis sany jarystyń ekinshi kúni de tolyqty. 72 kelide Abylaıhan Ámzeev Mohammad Reza Hodjatolla Mahtorıge ese jiberse, 82 kelide Dıas Qalen Iran sportshysy Rasýl Sade Garmsırıge qarsy tura almady.
Qorjynda qos qola
Qazaqstan sapyndaǵy tájirıbeli balýandardyń biri Nursultan Tursynov ta júldeden tys qalmady. Ol 87 kelide ol jubanysh beldesýinde qyrǵyzstandyq Melıs Aıtbekovty 7:2 esebimen utyp, qola júldege ıe boldy. Al 60 kelide Ernur Fıdahmetov mońǵolıalyq Baljınnám Seveenravdandy utyp, qolany qanaǵat tutty.
Osylaısha, bas bapker Serik Jumashev baptaǵan grek-rım kúresinen ulttyq qurama ulandary Azıa chempıonatyn toǵyz 9 medalmen Azıa chempıonatyn aıaqtady. Ulan-Bator bozkileminde 21-22 sáýir kúnderi burymdy balýandar ózara myqtyny anyqtaıtyn bolady.