Memlekettik qaıratker, bilim salasyndaǵy eks-mınıstr Asqat Aımaǵambetov «Grantty jeńip almaǵandarǵa ne isteýge bolady?» degen saýalǵa jaýap berdi.
Asqat Aımaǵambetov óziniń Facebook paraqshasynda osyndaı suraq kóp qoıylyp jatqanyn, sondyqtan jaýap berýdi jón kórgenin aıtty, dep habarlaıdy Almaty-akshamy.kz.
Bastysy áli de grantty jeńip alýǵa múmkindik bar. Nege?
Birinshiden, ıgerilmegen birneshe myń grant qaıtadan úılestiriledi. Iaǵnı grant alǵan talapkerlerden keıin turǵan talapkerlerge UBT-da jınaǵan upaı sanyna sáıkes beriledi. Sony kútýge bolady.
Ekinshiden, ákimdikterdiń granttary bar. Birneshe myń grant jergilikti búdjetten bólinedi.
Úshinshiden, «Qazaqstan halqyna» qorynyń granttary taǵy bar.
Tórtinshiden, keıbir talapkerler túrli sebep boıynsha jeńip alǵan granttarynan bas tartady. Olardyń sany da az bolmaıdy. Ol granttar da qaıta taǵaıyndalady.
Besinshiden, tipti eshteńe bolmasa, ýnıversıtetke aqyly túrde túsip, keıin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady.
Altynshydan, «gap year» arqyly bir jyl daıyndalyp, qaıtadan UBT tapsyryp, grantty jeńip alýǵa bolady. Ol meniń óz basymnan ótken oqıǵa. Bul da jaqsy sheshim.
Jetinshiden, kolejge túsýge bolady. Kolejde grant kóp, qajetti mamandyqtar boıynsha kolej bitirgender naryqta tapshy. Kerek bolsa, keıin ári qaraı JOO-ǵa túsip, qysqa merzimde joǵary bilim alyp shyǵýǵa da bolady.
Kórip otyrǵandaryńyzdaı múmkindikter óte kóp. Bári alda. Tolyq málimet alý úshin ýnıversıtetterdiń qabyldaý komısıasyna jolyǵý kerek, - dep jazdy Asqat Aımaǵambetov.