Araı Sabyrjan shet elderde jastar keńesin qurý, qazaq bıznesin ilgeriletý jaıynda sóz qozǵady
Búgin Astana qalasynda álemniń 40 memleketinen kelgen 200-ge jýyq qandastyń basyn qosqan Otandastar forýmy ótip jatyr, dep habarlaıdy almaty-akshamy.kz Halyq Uni-ne silteme jasap.
Otandastar forýmyna AQSH-tan arnaıy kelgen Google kompanıasynyń qyzmetkeri Araı Sabyrjan búginde AQSH-ta turatyn qazaqtar sany 100 myńnan asatynyn aıtyp, shetelde jastar keńesin qurý (ekspatrıant) qajet ekenin jetkizdi. Sondaı-aq sheteldegi ekspattardy elge tartý algorıtmin ázirleýdi usyndy.
«Qazaqstandaǵy bos jumys oryndary, ınvestısıa jáne bilim berý múmkindikteri týraly ózekti aqparatty taba alatyn aqparattyq platformalar men resýrstardy qurý. Sonymen qatar sheteldegi qazaq uıymdarynyń qurylymdyq negizin kúsheıtip, shetelde júrgen qazaqstandyqtardyń múddesin kórsete alatyn kásibı qaýymdastyqtar men birlestikter qurýǵa qoldaý kórsetý qajet», - dedi ol forýmynyń ashylýynda sóılegen sózinde.
Buǵan qosa, Araı Sabyrjan otandastardy biriktire alatyn jáne olarǵa qajetti saraptamalyq kómek kórsete alatyn dıasporalarǵa bedeldi kóshbasshylardy izdeý jáne qoldaý qajet dep esepteıdi.
Jobalardy tabysty júrgizý jáne granttar alý úshin otandastardyń zańgerlik jáne konsýltasıalyq qyzmetterge qol jetkizýin qamtamasyz etýge kúsh salý. Qazaqstanda jobalardy iske asyrý úshin qajetti daǵdylardy damytý men granttardy tartý úshin mamandandyrylǵan Bilim berý baǵdarlamalary men kýrstaryn qurý, - dep tolyqtyrdy sózin.
Sondaı-aq Araı Sabyrjan mádenı jáne bilim berý baǵdarlamalaryn keńeıtýge qatysty usynys aıtty.
Ol - otandastarǵa qazaq mádenıetin, tarıhyn jáne tilin úırenýge múmkindik beretin túrli bilim berý kýrstary men is-sharalaryn damytý. Dástúrli oqytý ádisterine qosymsha onlaın kýrstar sıaqty ınovasıalyq tásilderdi engizý. Shetelde qazaq mádenıeti men ónerin nasıhattaýǵa yqpal etetin mádenı zertteýlerdi, sondaı-aq jasandy jobalardy qoldaý kerek, - dedi A.Sabyrjan.
Taǵy bir usynys – qazaq bıznesin ilgeriletý men Atajurtpen baılanysty nyǵaıtý.
«Shetelde óz qyzmetin keńeıtýdi qalaıtyn qazaqstandyq kásipkerler men startaptar úshin platformalar men ınkýbatorlar quryp, bıznes-qoǵamdastyqty qoldaý jáne halyqaralyq kásipkerlik boıynsha keńes berý. Otandastar men Qazaqstannyń memlekettik ınstıtýttary arasynda tikeleı baılanys ornatý úshin aqparattyq resýrstar men platformalar júıesin ázirleý. Dıaspora ókilderi men qazaqstandyq bılik arasyndaǵy dıalog úshin turaqty is-sharalar men kezdesýlerdi uıymdastyrý kerek dep esepteımiz», - dedi Araı Sabyrjan.