Qazaqstandyq mýzykant Álibek Qaıyrbek Gımalaı taýlaryndaǵy eń bıik núktelerdiń birine — teńiz deńgeıinen 6200 metr bıiktikte ornalasqan Aılend Pık shyńyna kóterilip, sol jerde Nurǵısa Tilendıevtiń kúıin oryndady, dep habarlaıdy aqshamnews.kz
Muny ol kórnekti qazaq kompozıtorynyń 100 jyldyǵyna arnaǵan.
Bul ekspedısıa «Dúnıeniń shyńdarynda dombyra» atty halyqaralyq mádenı jobanyń bir bóligi sanalady. Jobanyń maqsaty — qazaqtyń dástúrli mýzykasyn álemniń eń bıik núktelerinde sımvoldyq túrde oryndaý arqyly keńinen nasıhattaý.
Álibektiń aıtýynsha, shyńǵa shyǵar aldynda ol akklımatızasıa kezeńinen ótip, daıyndyq barysynda bıiktigi 5644 metr bolatyn Kala Pattar shyńyna kóterilgen. Bul jerden Everest taýy anyq kórinedi.
Sapar barysynda mýzykant taý aýyldarynda, álpınıserdiń bazalyq lagerlerinde jáne tipti Sagarmatha ulttyq parkiniń aýmaǵynda shaǵyn konsertter uıymdastyryp, jergilikti turǵyndardy qazaqtyń dombyrasymen jáne dástúrli kúılerimen tanystyrǵan.