«Alatay Aqparat» ujymynda qurban aıtqa arnalǵan aq dastarhan jaıyldy.
Qurban aıt – Oraza aıttan keıin 70 kún ótken soń keletin meıram. Musylman qaýymy bul merekeni qatarynan úsh kún toılaıdy.
Aıt kúnderi qurbandyq shalynady. Bul kúnder Uly Mekkege qajylyqpen aıaqtalady. Al aıt kúnderi musylmannyń atqaratyn eń jaqsy isi – qurban shalý.
Qurban shalý Alla Taǵalaǵa jaqyn bolý, kúnálardyń keshirilýi, Jaratýshy Iemizdiń kóptegen nyǵmetterine shúkir etý, baı men kedeıge keńshilik jasaý úshin mindetteldi. Óıtkeni osy kúni barlyq adam Alla Taǵalanyń qonaǵy bolady, qurban etinen jeıdi, ony tartý etedi, odan sadaqa beredi.
Almatynyń qos birdeı basylymy «Almaty aqshamy» jáne «Vechernıı Almaty» gazetteriniń basyn biriktirip, qanatynyń astyna alyp otyrǵan «Alatay Aqparat» medıaholdıngi óz jumysynda tek shahardyń tynys-tirshiligin qamtyp qoımaı, ultymyzdyń ótken tarıhy men tereń fılosofıalyq máni bar dástúrli merekelerin de asa qurmetpen atap ótýdi dástúrge aınaldyrǵan.
Jalpy, ujymda dinı jáne ulttyq sana-sezimniń joǵary deńgeıde qalyptasýyna, oǵan tıisinshe qurmet kórsetýde ulttyq salt-dástúrdi nasıhattap otyrýdyń da mańyzy erekshe zor. Sondyqtan bolar, atalmysh ujymda uzaq ýaqyttan beri Aýyzashar turaqty úrdiske aınalyp, oraza ustaǵan qyzmetkerlerge turaqty túrde aýyzashar beriledi. Sonymen qatar, uzaq jyldar basylymda eńbek etken ardagerlerge materıaldyq jáne moraldyq qoldaý kórsetilip otyrady. Osy oraıda «Alatay Aqparat» medıaholdıngi Qurban aıt merekesin de erekshe atap ótti. Qurban aıttyń sońǵy kúninde qurbandyq shalynyp, aýlaǵa aq dastarhan jaıyldy. Basylymnyń janashyrlary men adal dosyna aınalǵan jazylýshylary da Qurban aıtpen quttyqtaı keldi.
Qashannan-aq qarbalasyp jatatyn redaksıanyń aýlasy da tańerteńnen bastap qyzý tirlikke toldy. Daıyndyqqa kirisken qyzmetkerler ózderiniń qalamǵa ǵana júırik emes, qazandy da qaınata biletindikterin kórsetti. Mal soıylyp, qazan kóterildi. Baýyrsaqtyń ısi men qos ıininen demalǵan samaýryn kelýshilerge jaqsy kóńil-kúı syılady.
Qonaqtardyń týra týǵan aýylyna kelgendeı kóńilderi kóterildi. Qos basylymnyń baıyrǵy oqyrmandary – Dinmuhamed Qonaev atyndaǵy mýzeı-úıiniń basshysy Dıar Asqaruly Qonaev, «Aıgólek» balalar jýrnalynyń bas redaktory Qymbat Ábildına, belgili jýrnalıs jáne qoǵam qaıratkeri Ermurat Bapı, medıaholdıngtiń shyǵarmashylyq damýy jónindegi keńes músheleri men bizdiń turaqty tálimgerlerimiz – Otandyq jýrnalısıka Akademıasynyń prezıdenti Saǵymbaı Qozybaev jáne Halyqaralyq mádenıetterdi jaqyndastyrý ortalyǵynyń jetekshi ǵylymı qyzmetkeri Eljan Birtanov, IýNESKO-nyń jetekshi ǵylymı qyzmetkeri Valerıı Jandáýletov, MedRemZavod kompanıalar tobynyń bas dırektory Arystanbek Jumaǵulov, tanymal otandyq bıznesmen jáne mesenat Saıahat Boranbaev, sondaı-aq qala ákimdiginiń ókilderi men basqa da qonaqtar jaıylǵan dastarhanǵa rızashylyqtaryn bildirdi. Aq dastarhan basyna jınalǵan qaýym Alataý aýdanyna qarasty «Myrzahmet» meshitiniń naıb-ımamy Oljas Baezovtyń adamgershilik, ádeptilik turǵysyndaǵy ýaǵyzdaryn tyńdap, ishki jan-dúnıelerin rýhanı azyqpen toltyrdy.
Jaqsy sóz – jarym yrys
Jurt bolyp dastarhan basyna jınalǵanda Quran oqyp, bata berý – qazaqtyń dástúri. Sondyqtan bizdiń ujym da óziniń aq dastarhanyna arnaıy Alataý aýdanynda ornalasqan «Myrzahmet» meshitiniń ımamy Oljas Baezovty shaqyrdy. Din qyzmetkeri as aldynda duǵamen bata aıtyp, jınalǵan qaýym ál-aýqattanǵan soń, Qasıetti Quran súrelerin oqydy. Ujymnyń úlkendi-kishili qyzmetkerlerin bir ortaǵa uıytyp ýaǵyz aıtty, «Qurban aıt» merekesiniń mánin ashty. Imamnyń aıtýynsha, bul musylman merekesi tek as iship, mal baýyzdaýdy maqsat tutpaıdy. Merekeniń túpki máni – kópten kórispegen, arasynda arazdyǵy bar adamdardy tatýlastyrý, muqtaj adamdarǵa kómek jasaýǵa sebepker bolý, kópshilikti ıman men meıirimge shaqyrý.
Búgingi kúni qazaq basyna is tússe ǵana qoı soıady. Qaıǵy kelse de, qýanysh bolsa da – sol. Alaıda Qurban aıttaǵy maldy biz tiriler úshin, ata-anamyz ben otbasymyzdyń amandyǵy úshin shalýǵa mindettimiz. Dúnıeden ótken soń, jaqyndarymyzdy joqtamaı, barynda baǵalap, óz paryzymdy týra jolmen atqaraıyq, – dedi ımam.
Sondaı-aq, din qyzmetkeri aıtýly meıramda qaıyrymdylyq jasaýdyń mánin áńgimelep berdi.
«Jasalatyn jaqsylyq istiń sadaqa bolýy úshin dinı turǵydan úsh erekshelikke ıe bolýy kerek: muqtaj janǵa berý, Alla razylyǵy úshin berilýi jáne berilgen sadaqa óz múlkinen, adal tabysynan bolýy tıis. Quranda «Bir jaqsylyq istegen adam on ese saýapqa ıe bolady» (6.Ánǵam-160) delingen. Sondyqtan bir-birimizge jaqsylyq qylaıyq. Paıǵambarymyz (s.ǵ.s) sahabalaryna aıtqan bir áńgimesinde «qandaı da bir is jasasa (bireýge jol kórsetý, joldaǵy zıan tıgizetin zatty alyp tastaý, ilim alý, úıretý t.b.), ol úshin bir sadaqa» dep ósıet etken», – dep aıtyp ótti.