Ekinshi dúnıejúzilik soǵys kezinde konslagerlerde qaza tapqan qazaqstandyq jaýyngerlerdiń jaqyndary izdestirilýde
İİ Dúnıejúzilik soǵys kezinde Germanıadaǵy konslagerlerde qaza bolǵan 927 otandasymyzdyń tizimi tabyldy. Búginde olardyń týystaryn izdestirý jumysy júrip jatyr. Bul týraly QR Qorǵanys mınıstriniń orynbasary Tımýr Dandybaev málim etti, dep habarlaıdy Almaty-akshamy.kz QazAqparat saıtyna silteme jasap.
«Vozvrashenıe ımenı» halyqaralyq patrıottyq uıymy bizge soǵys kezinde Germanıadaǵy konslagerlerde qaza tapqan 927 qazaqstandyq jaýyngerdiń tizimin berdi. Qazirgi ýaqytta qaza tapqandardyń týystaryn anyqtaý boıynsha jumystar júrip jatyr. Sondaı-aq, bizdiń mınıstrlik ókilderi bıyl 8 mamyrda «Plasdarm» qoǵamdyq uıymynyń shaqyrýymen Ýkraınaǵa baryp, Slavánsk úshin shaıqasta qaza tapqan 99 jaýyngerdiń, onyń ishinde jerlesimiz - leıtenant Úkibaı Bazarbaıdyń súıekterin qaıta jerleý rásimine qatysty. Odan bólek, qazirgi ýaqytta reseılik izdeý toby bizdiń 12 jerlesimizdiń dene qaldyqtaryna saraptama júrgizýde, keıin olar bizge beriledi», - dedi Tımýr Dandybaev.
Buǵan deıin QR Qorǵanys mınıstriniń orynbasary İİ Dúnıejúzilik soǵysta habar-osharsyz ketken 7 otandasymyzdyń máıiti tabylǵanyn aıtty. Onyń málimdeýinshe, joǵalǵandardyń aty-jónderi anyqtalyp, elge jetkizilgen. Aıta keteıik, búgin elordada Uly Otan soǵysynyń 80 jyldyǵyna arnalǵan «Álemdi qorǵaǵandardy este saqtaý, aqıqatty jetkizý» atty halyqaralyq konferensıa ótip jatyr. Shara «Atamnyn Amanaty» qoǵamdyq birlestigi «Reseıdiń izdeý qozǵalysy» jalpyreseılik qoǵamdyq qozǵalysymen birlesip, Prezıdenttik granttar qorynyń qoldaýymen uıymdastyrylyp otyr.