Bul AITV-dan aıyqqan úshinshi adam
Nemis zertteýshileri 53 jastaǵy er adamnyń diń jasýshalaryn transplantasıalaýdan keıin AITV (Adamnyń ımmýn tapshylyǵy vırýsy) ınfeksıasynan tolyq aıyqqan úshinshi naýqas bolǵanyn málimdedi, dep habarlaıdy Almaty-akshamy.kz QazAqparatqa silteme jasap.
Nature jýrnalynda jarıalanǵan maqalaǵa sáıkes, 2008 jyly AITV dıagnozy qoıylyp, «Dússeldorf pasıenti» dep atalyp ketken er adamǵa 2013 jyly qandaǵy qaterli isik - ótkir mıeloıdty leıkozdy emdeý úshin transplantasıa jasaldy.
«Dússeldorf ýnıversıtetiniń aýrýhanasy tórt jyldyq júıeli baqylaýdan keıin álemde AITV-ny emdeýdiń alǵashqy dálelin keltire alady», - delingen zertteýshilerdiń dúısenbide jarıalanǵan málimdemesinde.
AITV-dan emdeýdi bastaǵannan keıin alty aı ótken soń «Dússeldorf pasıentine» jedel mıeloıdty leıkoz (JML) dıagnozy qoıyldy. Biraq kóńil kónshitpeıtin boljamǵa qaramastan, dárigerler eki aýrýdy bir emdeýmen jeńip shyǵý múmkindigin kórdi.
Ol úshin dárigerler qaýipti aýrý túrlerin diń jasýshalaryn transplantasıalaý arqyly emdeýge sheshim qabyldaǵan, delingen maqalada.
2006 jyly «Berlındik pasıent» degen atpen belgili Tımotı Reı Braýn osy emnen keıin AITV-dan aıyqqan álemdegi alǵashqy adam boldy. Braýn 2020 jyly 54 jasynda leıkozdyń qaıtalanýynan keıin qaıtys boldy, biraq AITV-dan emdeý onyń ómiriniń sońyna deıin tıimdi boldy.
Adam Kastıleho esimdi «londondyq pasıent» 2017 jyly terapıany toqtatyp, AITV-dan aıyqqan ekinshi adam boldy.
Transplantasıadan keıin alty jyl ótken soń «Dússeldorf pasıenti» AITV-ǵa qarsy preparattardy qabyldaýdy toqtatty. Sodan keıin zertteýshiler pasıenttiń qanynda belsendi vırýs belgileri qalmaǵanyna kóz jetkizý úshin aýqymdy synaqtar júrgizdi.
Bul zertteýler AITV emdeý ádisterin damytýda jaqsy jetistikterdi kórsetkenimen, bul emdeý strategıasy halyqtyń kópshiligi úshin qolaıly emes. Bul - emdelmeıtin jáne ómirge qaýip tóndiretin jaǵdaılar úshin ǵana qarastyrylatyn óte ınvazıvti, joǵary táýekeldi prosedýra, dep atap ótilgen zertteýde. Sondaı-aq, kóp jaǵdaıda oǵan donor tabý qıyn.
- Qazirgi ýaqytta ǵylymnyń maqsaty - alynǵan bilimge negizdelgen táýekeli az prosedýralardy ázirleý, AITV-ǵa qarsy dárini adamdar úshin qoljetimdi etý, - dep qosyp ótti maqala avtorlary.