5 maýsymda ótetin referendýmǵa baılanysty álemniń ár túkpirinde saılaý ýchaskeleri daıyndyqtaryn bastady.
Germanıada 2 saılaý ýchaskesi ashylady. Onyń biri Berlındegi Qazaqstan elshiliginde bolsa, ekinshisi Maındaǵy Frankfýrt qalasyndaǵy Bas konsýldyqta, dep habarlaıdy Almaty-akshamy.kz Qazaqtv.com-ǵa silteme jasap.
Konsýldyq bóliminiń qyzmetkerleri osy elge kelgen soń tirkelgen barlyq qazaqstandyq azamattarǵa referendým týraly elshiliktiń resmı saıty jáne áleýmettik jelileri arqyly aqparat berdi. Saılaý ýchaskeleri jergilikti ýaqyt boıynsha tańǵy saǵat 7-de ashylyp, keshki saǵat 20.00-de jabylady
"Germanıada júrip júrgen Qazaqstannyń 18 jasqa tolǵan jáne belsendi saılaý quqyǵyna ıe azamattar qatysa alady. Biz aýqymdy jumys ótkizdik. Osyǵan baılanysty, qazirgi tizimde bizde eki júzden asa múmkin úsh júzge baratyndaı Qazaqstan azamattary tirkelgen. Solar endi jeksenbi kúni kelip, óz daýystaryn beredi dep oılaımyz", - №247-shi saılaý ýchaskesi komısıasynyń tóraǵasy Sholpan Shynasylova.
Sondaı-aq, 5 maýsym kúni Qytaıdaǵy otandastarymyz da azamattyq ustanymyn bildire alady. Saılaý ýchaskesi Nur-Sultan qalasy ýaqytymen tańǵy 5-ten keshki 6-ǵa deıin ashyq bolady. Daýys berýshilerge tıisti aqparat Qazaqstannyń Shanhaı men Gonkongtaǵy Elshiligi men bas konsýldyqtarynyń saıttary men áleýmettik jelidegi paraqshalarynda jarıalanǵan. Referendým barysyn baqylaý úshin el astanasyna Shanhaı Yntymaqtastyq Uıymy baqylaýshylarynyń mısıasy keledi. Qazirgi ýaqytta aspan asty elinde koronavırýstyń taralýy joǵary. Osyǵan baılanysty dıplomatıalyq ókildik azamattardyń qaýipsizdigin qamtamasyz etý baǵytynda naqty sharalar qabyldaıdy. Aıta keteıik, indetke baılanysty azamattardyń bári referendýmǵa qatysa almaıdy. Karantın aýmaǵyndaǵylar men lokdaýnǵa jabylǵan ýnıversıtetterdiń stýdentteri bul sharany ótkizip alýy múmkin.
"Qytaıda oqyp júrgen oqýshylardyń Qazaqstanǵa qaıtýyna baılanysty, bizdiń syrtta Qytaıda júrgen azamattardyń sany kúrt tómendedi. Bıyl bizdiń sanaýymyz boıynsha, bizdiń 257 ýchaskesiniń 95 azamat tirkelgen. Shanhaıda 25 azamat, Gonkongta 36 azamat tirkelgen. Jalpy olar boıynsha biz Ortalyq saılaý komısıasynyń reglamentine saı, olardy aqparattandyrý jáne osy ýchaske boıynsha aqparatty 10 kún buryn biz olarǵa málimdedik", - dedi SHYU Hatshylyǵy janyndaǵy turaqty ókili, QR-dyń QHR-daǵy elshiliginiń janyndaǵy #257 saılaý ýchaskesi komısıasynyń tóraǵasy Nurlan Aqqoshqarov.