Gerat, Kabýl, Mazarı – Sharıf bul quddy bir shyǵys ertegilerindegi qala ataýlary uqsaýy múmkin. Shyn máninde, bul soǵys pen qantógisten kóz ashpaǵan Aýǵan eliniń qalalary. Aýǵan soǵysynyń yzǵary áli de elimizdiń jadynan ketken emes. Jalpy kindik azıalyq bul elde qarý úni áli de basylǵan joq. Aýǵan fenomenin túsiný ońaı emes. Dese de, qazaq barlaý mektebiniń negizin qalaýshy, Aýǵanstan Islam Respýblıkasyndaǵy Qazaqstan Respýblıkasynyń burynǵy Tótenshe jáne Ókiletti Elshisi, QR UQK-niń «Qurmetti qyzmetkeri», Aýǵan soǵysy jáne arnaýly organdar ardageri, general-maıor Ómirtaı Maqashuly Bitimovpen áńgimelese otyryp osy bir túıinniń jaýabyn túsinip kóremiz.
Alǵashqy sapar
Soǵys – jer-kóktiń jaýy. Biri soǵysqa kezdeısoq barsa, endi biri ınternasıonaldyq boryshyn sanaly túrde oryndady. Er kezegi úshke deıin demekshi, bizdiń keıipker bir emes úsh márte Aýǵan topyraǵyna aıaq basty.
Ótken ǵasyrdyń sekseninshi jyldarynyń basynda Máskeýdegi KSRO Memlekettik qaýipsizdik komıtetiniń Birinshi Bas basqarmasynyń quramynda orta boıly, aqquba óńdi, salmaqty, kishipeıil, qarapaıym minezdi jerlesimiz Ómirtaı Maqashuly qyzmet atqaryp júredi. Sol kezdiń ózinde otyzdyń ústine jańa ǵana shyqqan azamat arnaıy daıyndyqtan ótip, parsy jáne darı tilderin meńgeredi. Onyń da syry belgili, óıtkeni Aýǵanstanda ınternasıonaldyq boryshyn óteýge tájirıbeli ofıser qajet edi. Tapsyrma ońaı emes. Syrtqy barlaý baǵyty boıynsha, soǵys aýmaǵynan mańyzdy aqparattardy «ortalyqqa» jiberý bolatyn. Jalpy Odaq boıynsha 25 barlaýshy iriktelipti. Sol kil júırikterdiń ishinen myńnnan tulpar atanǵan keıipkerimiz jıyrma bestiń ortasynan oıyp turyp oryn alǵan bolatyn. Aýǵan jerine kelgende tipti jıyrma bestiń ony úılerine qaıtarylǵan. Al qazaq balasy bolsa synnan súrinbeı qyzmetin jalǵastyrypty. «Munyń syry nede?» deseńiz, onda bir sát keri sheginip keıipkerimizdiń balalyq shaǵyna, týǵan ortasyna oralaıyq.
Ómirtaı Maqashuly 1951 jyldyń 4 aqpanynda elimizdiń shyraıly shyǵysynda dúnıege kelgen. Balalyq shaǵy ortasyna márttigimen tanylǵan ákesi Maqashtyń qolynda ótedi. Otbasynda qazaqy tárbıe kórip, ómirge degen kózqarasy qalyptasady. Ákesi eńbeksúıgishtikti, batyldyqty jáne elge degen sheksiz adaldyqty úıretedi. Áıtse de, ákesi bolashaq ofıserdiń er jetip, azamat bolǵan sátin kóre almady. Ókinishke oraı, 60 jasynda qatty naýqastanyp dúnıeden ótedi. Bálkim, Semeı atom polıgonyndaǵy synaqtardyń kesirinen bolar nemese taǵdyrdyń jazýy ma, jalpy sol jyldary osyndaı jumbaq ólimder jıi-jıi oryn alǵanyn keıinnen mamandar ashyq aıtyp júrdi. Jastaıynan ákeden erte aırylǵan boz bala, sheshesiniń qolyna qarap qalady. Aýyr qaıǵy ony erte eseıtedi. Qaraǵaıǵa qarsy bitken talapshyl minezdi qalyptastyrady. Jas bolsa da, dúnıeniń syry bilimde ekenin jiti túsinedi. Segizinshi synypty Semeı qalasyndaǵy №28 mektepte aıaqtap, onjyldyqty
№ 36 mektepte úzdik baǵamen bitiredi. Semeı qalasyndaǵy Krýpskaıa atyndaǵy muǵalimder ınstıtýtynyń fızıka-matematıka fakúltetine bilimin shyndap, mamandyq alyp shyǵady. Óz erkimen áskerge suranyp, Otan aldyndaǵy boryshyn Keńes Armıasy Otar dıvızıasy tankıster polkynda, PT-76 júzgish jeńil tankiniń mehanık-júrgizýshisi bolyp abyroımen óteıdi. Sózsiz áskerdegi tárbıe, alǵan bilimi sol Aýǵanstandaǵy soǵysta paıdaly bolǵany aıtpasa da túsinikti. Sonymen hosh. Aýǵanǵa barǵan alǵash saparyna oralsaq. Ol týraly general bylaı syr shertedi.
- 1976 jyly Mınsk qalasyndaǵy Keńes Odaǵy Memlekettik qaýipsizdik komıtetiniń qarsy barlaý Joǵary kýrsyn támamdap, leıtenant sheninde Aıakóz aýdandyq MQK bólimine jedel qyzmetker bolyp taǵaıyndaldym. Tapanshadan atýdan úzdik kórsetkishter kórsettim. Qyzmetime baılanysty kadrlyq rezervke engizdi, dál osy jyldary Iran men Aýǵanstandaǵy revolúsıa, tóńkerister oryn aldy. Keńes Odaǵynyń basshylary parsy jáne darı tilderiniń mamandaryna tapshy bolǵandyqtan qysqa merzimde olardy daıyndaýǵa sheshim qabyldaıdy. Men osyǵan deıin barlaý baǵyty týraly bilgen emes edim. Qarapaıym otbasynan shyqqan fızıka-matematıka muǵalimi boldym. Arnaıy organdar maǵan qarapaıym adamdar bile bermeıtin basqa dúnıelerdi ashty. Men Máskeýde shet tilderin jatpaı-turmaı oqydym. Tipti, aýyz eki sózderdi de jattaı bastadym. Nátıjesinde aýǵandyqty jańylystyratyn deńgeıge jettim. 1979 jyly Aýǵan soǵysy bastalǵanda bizdi birinshi partıamen otty núktege attandyrdy,-deıdi aýǵandyq ardager.
Ofıser aldymen Aýǵanstannyń astanysy Kabýlǵa keledi. Keńes áskerleri jańa kirgen sát. Jergilikti halyq alaı-dúleı kóshýde. Biraz jyl salystyrmaly túrde beıbitshilikte ómir súrip qalǵan halyq endi taǵy da úlken shaıqastardyń bastalýyn ishteı sezdi. Memlekettiń tynyshtyǵy áni-mine shaıqalaıyn dep turǵan úreıge toly shaq. Mine, barlaýshynyń kózine Aýǵanstan osyndaı tynyshtyǵy buzylǵan kúıde alǵashqy ret kórindi. Biraq ár túrli jaǵdaıǵa tas-túıin daıyn azamat ottaı júregi men muzdaı aqylyn saqtady. Kóp uzamaı barlaýshy topty Iranmen shekaralas Gerat provınsıasyna jiberedi.
- Áli esimde kólik ushaǵynyń artqy esikteri ashyldy. Qarýlanǵan top tez-tez ushaqtan sekirip tústik. Áskerı ushaq toqtamaǵan kúıde aspanǵa qaıta kóterildi. Onyń sebebin keıin bildik. Óıtkeni, áýejaıdaǵy ushaq kózge tússe, lezde shabýyldaýǵa ushyraýy múmkin. Sondyqtan «joldan qalmaı» aspanda izin sýytty. Aeraporttyń japan dalasynda turmyz. Atamyn degen jaý bolsa, minekeı kóz aldynda alaqandaǵydaı kórinýdemiz. Jedel baılanysqa shyǵyp, barar baǵytymyzdy anyqtadyq. Bekitilgen jerge bet alǵanda alystan bir kishigirim bekinistiń sulbasy kórindi. Osy eki aralyq qaýipke toly edi. Taǵdyrymyzǵa oraı, jaý bizdi baıqamady. Eki ortada esh qaqtyǵyssyz bekiniske jettik. Terimizdi sýytyp otyrǵanymyz sol edi, áskerı shatyrymyzǵa oqtar atyla bastaldy. Tóbeden tóngen burshaqtaı sebelep jatyr. «Osymen saparymyz aıaqtaldy ma?» degen ókinishti oılar keldi. Áskerı tapsyrmaǵa kirispeı jatyp, osylaı ómirimizdi aıaqtaǵanymyz ókinishti – aq dep qoıamyn ishteı. Birde qarýlardyń kezegi toqtap, álsin-álsin bir – eki avtomattyń atylǵan daýysy estildi. Jaý bekiniske enip, jaralylardyń janyn jahamdanǵa bir-birlep attandyryp jatqan bolar... Barlaýshylar shatyrdan syrtqa shyqtyq. Sol kezde ózenniń arǵy betindegi jaý keri burylyp qashyp bara jatqanyn baıqadyq. Sóıtse, bul kúndelikti kórinis eken. Ózenniń arǵy betinen dushpandar oq atyp, keri qashyp ketedi eken. Jalǵyz atylǵan oqtar ózimizdiń seriktesterdiń oqtary. Keıin ondaı shabýyldarǵa etimiz úırendi, - dep esine aldy barlaýshy general.
Bul birinshi issapar bolatyn. Úsh jyl alty aı boıy Keńes Odaǵynyń Syrtqy barlaý basqarmasynyń tapsyrmasymen Aýǵanstanda qaýip-qaterlerge boı bermeı, kyzmetin adal atqarady. Jergilikti turǵyndarmen qarym-qatynas ornatyp, synnan súrinbeı ótedi. Ortalyqtaǵy basshylardyń usynysymen KSRO MQK -nyń Qyzyl Týly Syrtqy barlaý qyzmetiniń ınstıtýtyna túsip, túrik tilin meńgeredi.
1985 jyly atalǵan joǵary oqý ornynyń basshysy general Ivan Ivanovıch Zaısev búkil tyńdaýshylar (Slýshatelı) aldynda Aýǵandaǵy soǵysta kórsetken erligi úshin Ómirtaı Bıtımovtyń keýdesine «Qyzyl Juldyz» ordenin taqqanda qatysýshylar tańqalsa, al bizdiń qarakóz baýyrlarymyzdyń qýanyshynda shek bolmaǵany ras. Osynyń barlyǵy keıipkerimizdiń Otanǵa degen adaldyǵy, sportqa degen súıispenshiligi, qyzmetke degen rıasyz berilýiniń jáne óziniń týmasynan qalyptasqan azamattyq hám adamı qasıetteriniń arqasynda qol jetimdi boldy.
Ólara
1989 jyly 15 aqpanda Keńes áskeri Aýǵanstannan shyǵaryldy. General-leıtenant Borıs Gromov eki eldiń arasyndaǵy Dostyq kópirinen ótip bara jatqanda Aýǵan jerinde áskerı qyzmetshilerdiń qalmaǵany týraly qansha aıtqanymen bóten elde barlaýshylardyń bolǵany anyq edi. Olar eshkimge dabyra qylmaı óz boryshtaryn ótedi. Arasynda bizdiń Ómirtaı Maqashuly da boldy. Ol týraly keıipkerimiz bylaı deıdi.
- Soǵys aıaqtalatyny anyq edi. Barlyǵymyz áskerimizdiń Aýǵan jerinen shyǵarylatyn kúndi taǵatsyzdana kúttik. Soǵys aıaqtalýyna eki apta qalǵanda meni basshylyq shaqyrdy. Aýǵanstanda bolǵan bir «joldasymyz» meni sol elge qaıta jiberýge baıanat jazypty. Basshylyq árıne maǵan úlken senim bildiretinin aıtyp, arqamnan qaǵyp soǵysqa qaıta jiberdi. «Ýaıymdama Ómirtaı Makashevıch, Aýǵanda eki apta bolyp, elge qaıta oralasyz» degen bolatyn. Aýǵanda eki apta emes, Keńes Odaǵy qulaǵansha boldyq. Tek, 1992 jyly ǵana elge oraldyq. Shyny kerek, Keńes áskeri elden shyǵarylǵanda Nadjıbýlla úkimeti qalap, ár túrli aǵymdaǵy dinshilder, modjahedtter óz ara bılikke talasty. Kabýl sol talastyń ortalyǵyna aınaldy. Soǵys ishki soǵys odan ári kúsheıdi. Barlyǵymyz biletinde keıinde tálipter qozǵalysy paıda boldy. Olarmen de qarym-qatynas ornatyp, jumys jasadyq. Biz Kabýlda bolǵanda Keńes Odaǵynyń elshiliginde birde-bir dıplomat qalmady. Barlyǵy barlaýshy quram edi. Biz shabýyldy kútýmen boldyq. Qashan bizge shabýyl jasaıdy? Tutqynǵa alady? Osy ispetti suraqtar, maza bermedi. Keıin osyndaı jaǵdaıǵa da boıymyz úırendi. Jalpy barlaýshylar quramynda ózbek, tájik, qyrǵyz azamattary boldy. Barlyǵymyz ortaq iske jumyldyq. Meniń túr álpetimen Aýǵandaǵy hazarı halqyna uqsaıtynmyn. Jergilikti kıimdi kıip, el ishinde júretinmin. Meni eshkim shýravı (sovettik) dep oılamaǵan. Sóılegen sózimde hazarılik boıaý basym bolatyn. Sol arqyly tapsyrmany laıyqty deńgeıde atqardyq,-deıdi ol.
Aýǵanǵa barǵan ekinshi sapary da ońaı bolmaǵany belgili. Óıtkeni, barlaýshylardy qorǵap qalar ásker joq. Jańa ornaǵan bıliktiń kózqarasy belgisiz. Soǵys aıaqtalǵanymen saıası turaqtylyq bolmady. Barlaýshy ofıser osyndaı qysyltaıań ólara kezinde de synaqtan súrinbeı ótti.
Týǵan eldeı el bolmas
Sonymen elge oralý sáti de keldi. Keńes Odaǵy ydyrap, Qazaqstan egemendigin alǵan kezeńde general Júken Márdenov, ol kezde komıtettiń tóraǵasynyń orynbasary, barlaý boıynsha kýrator jáne QR UQK tuńǵysh tóraǵasy Bolat Abdrahmanuly Baekenov keıipkerimizge elge qaıtýǵa usynys jasaıdy. Ol kezde Ómirtaı Maqashuly Mazarı-SHarıfte issaparda edi. Birden Máskeýge oralyp, bir aı ishinde metodıka, strýktýra,qajetti ınformasıalardy jınap, kerekti basshylarmen kezdesip, egemendi eldiń barlaý qyzmeti qandaı bolý kerek degen suraqtarǵa jaýap izdegen eken. Osylaısha, 1992 jyly Qazaqstan Respýblıkasy Syrtqy ister mınıstrliginiń apparatyna jumysqa qabyldanady. 1993 jyly Túrik respýblıkasyndaǵy elshilikte keńesshi qyzmetine qosymsha arnaıy tapsyrmalardy kóregendikpen atqarady. Ankara qalasynda qazaq eliniń atynan tuńǵysh konsýl boldy. Sol jyldary Ortalyqtyń baqylaýynda turǵan naqty is-shara boıynsha esep berýge kelgende UQK - nyń birinshi orynbasary Jeńisbek Kárimuly Jumanbekovtyń qabyldaýynda bolady. Tanysyp, qyzmet esebin tyńdap, onyń usynys oılaryna erekshe qulaq tigedi. Artynan kóp ýaqyt ótpeı J.Jumanbekov Ulttyq qaýipsizdik komıtetiniń tóraǵasy qyzmetine taǵaıyndalǵan da, birden Ómirtaı Maqashulyn Ortalyqqa shaqyryp, barlaý jumysyn nyǵaıtý qajettigin eskerip, onyń aldyna naqty maqsat qoıady. Shyndyǵyna kelgende osy jyldary qyrýar jumystar iske asady. Jańadan qurylyp jatqan elshilikter men ókildikterdiń múmkinshilikterin tolyq jáne tıanaqty paıdalana bilgeni anyq. General-leıtenant J.K.Jumanbekovtiń qoldaýymen barlaý basqarmasy, Bas barlaý basqarmasy deńgeıine kóterilip shtattyń sany ósip, shet elderde ókildikter ashyldy. Jeńisbek Kárimuly týraly keıipkerimiz tek oń pikirlerdi aıtady. Onyń aıtýynsha, Jeńisbek Kárimuly memlekettiń múddesin eskerip sheshim qabyldaıtyn. Ózine eshqandaı jaqyndyǵy joq, buryndary baılanysy bolmaǵan, Aýǵan soǵysynyń eń shıelenisken kezeńderinde qyzmettik mindetin atqarǵan Ómirtaı Maqashulyn qoldap, oǵan senim artýy ol kisiniń - naǵyz memleket qaıratkeri, kóregen basshy ekendiginiń dáleli. Sondyqtan olardy Qazaqstan Respýblıkasy Barlaý qyzmetiniń irgetasyn qalaǵan jandardyń biri emes, biregeıi desek artyǵy bolmas.
Ýaqytynda keıipkerimiz QR Syrtqy ister mınıstrliginiń Taıaý, Orta Shyǵys jáne Soltústik Afrıka basqarmasyna jetekshilik jasap, atalmysh eldermen ártúrli saladaǵy qarym-qatynastar qalyptastyryldy.
- Arnaýly organ tarapynan QR Syrtqy ister mınıstrliginde joǵary laýazymǵa ıe bolǵan alǵashqy ofısermin. Sol jyldary QR Syrtqy ister mınıstriniń orynbasary, keıin birinshi orynbasary bolyp qyzmet atqarǵan búgingi Prezıdentimiz Qasym-Jomart Toqaevpen jemisti jumys jasadym. Birde óz basqarmamnyń qyzmetkerlerine arnap nusqaýlyq jasap, qujatty bekitý úshin Qasym-Jomart Kemelulyna kirgizdim. Ol nusqaýlyqty oqyp otyryp, osyndaı nusqaýlyq mınıstrliktiń sheteldegi barlyq qyzmetkerleri úshin qajet ekenin aıtyp, maǵan tolyqtyrýdy buıyrdy. Keıin ol kisiniń pikirin negizge ala otyryp atalmysh qujatty bekittik. Qasym-Jomart Kemeluly ishki mádenıeti joǵary adam. Adamnyń oıyn bólmeı tyńdaıdy, usynystardy qoldaıdy, daýys kóterip sóılegenin kórgenim joq. Onymen birge jumys jasaý jemisti jáne jeńil bolatyn. Keıinde Syrtqy ister mınıstr bolyp taǵaıyndalǵan jyldary da jumys babymen kezdesip turatynbyz. Sonymen qatar, sol kezdegi QR Syrtqy ister mınıstri, memleket qaıratkeri Qanat Saýdabaevpen de ońaı til tabystyq. Qansha jyl boıy Túrkıada birge qyzmette boldyq. Keıin 2010 jyly Eýropadaǵy qaýipsizdik jáne yntymaqtastyq uıymyna (OBSE) Qazaqstan tóraǵalyq etkende birlese qyzmet atqardyq,-dep óz estelikterimen bólisti.
2002 jyly Ómirtaı Maqashuly QR UQK-niń Barlaý qyzmetiniń birinshi basshysy laýazymyna qaıta oralyp, jeti jyl ishinde jumys nátıjesin joǵary kóterip, el basshylarynyń senimin aqtaǵany anyq. Dál sol jyly Qazaqstan Respýblıkasy Prezıdentiniń jarlyǵymen Ómirtaı Maqashuly Bıtımovke joǵary áskerı shen «general-maıor» ataǵy berildi. Tisqaqqan barlaýshynyń ómirinde qoldaý kórsetip, kómek qolyn sozǵandardyń biri - QR UQK-niń burynǵy tóraǵasy general-leıtenant Nartaı Dýtbaev bolatyn. Keıipkerimiz prınsıptik kózqarasy úshin keı basshylarmen til tabyspaı, qyzmetten ketýge baıanat jazǵanda Nartaı Nurtaıuly basshylyqqa kelip, baıanatyn keri qaıtarǵan. Bilikti barlaýshyny qyzmette qaldyryp qana qoımaı, joǵaryda aıtylǵan Barlaý qyzmetine basshy etip taǵaıyndady. Bul da onyń, ómirlik tájirıbesi mol, peıili keń, adam tanıtyn qasıetke ıe memleketshil tulǵa ekenin dáleldep tur. Ómirtaı Maqashuly da QR UQK-niń burynǵy birinshi basshysyna qańqý sózge ilespeı, adamǵa naqty baǵasyn beretin tik minezi úshin dán rıza.
Úshinshi sapar
Joǵaryda aıtyp ótkendeı general Ó. Bıtımovtyń ómiri arnaýly organ jáne el tarıhyndaǵy mańyzdy oqıǵalarǵa baı. Taǵdyrdyń talaı kedergilerge toly buralań joldaryn ótip, ustazdan, jedel ókilge, keıinde syrtqy barlaý qyzmetiniń qyzmetkerinen táýelsiz Qazaqstannyń barlaý qyzmetiniń basshysyna deıin kóterildi. Eshqandaı qıynshylyqtan qoryqpaı, alǵa qoıylǵan maqsattaryna qol jetkizetin. Sondaı bir synaqtardyń biri Aýǵanstanǵa úshinshi sapary bolatyn. 2010-2011 jyldary QR SİM-niń erekshe tapsyrmalar boıynsha elshisi,Aýǵanstan boıynsha arnaıy ýákili retinde talaı mańyzdy isterdi atqardy. Sol kezdegi tarıhı Samıtke Aýǵanstan Prezıdenti Hamıt Karzaıdyń qatysýyn uıymdastyrdy. 2011 jyly Memleket basshysynyń Jarǵysy boıynsha general Ómirtaı Bitimov Aýǵanstan Islam Respýblıkasyndaǵy Qazaqstan Respýblıkasynyń Tótenshe jáne Ókiletti Elshisi bolyp taǵaıyndaldy. 2018 jyldan bastap Qazaqstan-Aýǵanstan damý jáne seriktestik Asosıasıasynyń Tóraǵasy boldy. Jat elde jeti jyl aıanbaı eńbek etti.
- Joǵary basshylyqtyń buıryǵymen Aýǵanstanǵa qaıta oraldym. Bul endi salystyrmaly túrdegi tynyshtyq ornaǵan el edi. Halyq óz tirshiligine kirisken shaq. Biz de óz mindetimizdi atqardyq. Bir qyzyǵy meniń eski tanystarym da memlekettik qyzmette úlken laýazymdarǵa ıe bolypty. Biri mınıstr, biri provınsıa gýbernatory degendeı, el tutqasyn ustar azamattarǵa aınalypty. Aralastyǵymyz ári qaraı jalǵasty. Osylaısha, TMD boıynsha elshilerdiń arasynda eń tanymalyna aınaldym. Barlyǵy bizdiń elshilikke kelip, mańyzdy sharýalardy sheshýge tyrysatyn. Keıde burynǵy ádetime salyp, jergilikti turǵyndardyń kıimin kıip, el aralaımyn. Sol kezde halyqtyń da ózgergenin baıqadym. Sóılem máneri, turmys-tirshiligi ózgeripti. Búginde ol elde taǵy da ózgerister oryn alypty. Qubylmaly zaman týǵan eken. Oılap tursam úsh saparymda Aýǵanstannyń úsh túrli jaǵdaıyn kórdim. Aýǵan eli kóz aldymda ózgerdi. Keńes Odaǵy men Aýǵanstan arasyndaǵy soǵysty ár túrli baǵalaýǵa bolady. Saıası sheshim durys qabyldandy ma, qate boldy ma, ol suraqtyń jaýabyn tarıhshylar beredi. Áskerılerdiń mindeti qoıylǵan tapsyrmany naqty oryndaý,-deıdi ol.
Keıipkerimizdiń ómiri jas urpaqqa úlgi ekeni sózsiz. Eren eńbegi eskerilip, «Qyzyl Juldyz» (1985), İİ- dárejeli «Dańq» (2009), İİ- dárejeli «Dostyq» (2015) ordenderimen jáne ondaǵan memlekettik, vedomstvalyq mereıtoılyq medaldar jáne kóptegen Qurmet Gramotalarymen nagradtalǵan. Aýǵanstannyń Mır Madjıdı Han joǵary medalimen marapattaldy. Búginde Ómirtaı Maqashuly Qazaqstan Respýblıkasy «Generaldar keńesi» respýblıkalyq qoǵamdyq birlestiginiń Astana qalasy boıynsha fılıalynyń tóraǵasy. Qurmetti eńbek demalysynda júrse de bolashaq urpaqty áskerı - patrıottyq baǵytta tárbıeleý jumystarymen belseńdi aınalysyp júr. Sybaılas jemqorlyqqa qarsy respýblıkalyq keńes múshesi. Generalmen birge jumys jasaǵan azamattar onyń basshyǵa tán aǵalyq, ákelik qamqorlyq týraly kóp aıtady. Uzaq jyldar boıy qyzmette bolyp ózinen keıin kóptegen shákirtter qaldyrdy. Olar elimizde jáne shetelde jemisti qyzmet atqarýda. Ómirlik jary Aıtjamal apaımen birge balalaryn qoǵamnyń laıyqty músheleri etip tábıelep, ósirdi.
Ómirtaı Maqashev ómirin Otan qorǵaýǵa arnaǵan kásibı ofıser, tájirıbeli barlaýshy, saýatty dıplomat. Ómirtaı aǵa Bıtımovtyń ómir joly ómirin arnaýly qyzmetpen, dıplomatıamen baılanystyramyn deıtin el jastary úshin ónege ekeni sózsiz.
Aýǵandyq ardager aqpan aıynyń 4 kúni jetpistiń tórteýine kelgeli tur, mereıli data qarsańynda keıipkerimizge zor densaýlyq, uzaq ómir, otbasylyq baqyt, jas urpaqty patrıottyq tárbıeleý jolyndaǵy qajyrly eńbegine sáttilik tileımiz!
Elim deıtin erler kóp bolsyn!