Almaty qalasynda Qazaqstan Respýblıkasynyń kórnekti áskerı jáne qoǵam qaıratkeri, general-maıor Ámirbek Ánýaruly Tógisovke arnalǵan memorıaldyq taqtanyń ashylý rásimi ótti.
Almaty qalasynyń tórindegi (M.Tólebaev kóshesi, 172-úı, Shevchenko kósh. qıylysynda) 1998-2020 jyldary ózi turǵan úıdiń janynda ótken eske alý sharasyna Ámirbek Ánýarulynyń qyzmettes bolǵan joldastary, kórshileri, týǵan-týystary jáne BAQ ókilderi qatysty, dep habarlaıdy aqshamnews.kz.
Taǵzym etý sharasynda Qazaqstan Respýblıkasy Ulttyq ulany №5571 áskerı bóliminiń áskerı orkestri Qazaqstan Respýblıkasynyń Memlekettik ánuranyn oryndady.
Bul jaıdan-jaı emes. Sebebi, Ámirbek Ánýaruly búkil sanaly ǵumyryn Qazaqstannyń Qarýly Kúshterine arnaǵan eren tulǵa. Ol 1990 jyldary elimizdiń İshki áskeri men Qarýly kúshteriniń qalyptasýyna, damýyna tikeleı atsalysty. Tipti, elimizdegi alǵashqy áskerı buıryqtyń tujyrymdamasyn jazyp shyqqan. Sondaı-aq, jastardy áskerı-patrıottyq rýhta tárbıeleý júıesiniń negizin qalaýshylardyń biri boldy.
Qyzmet jolynda Magadan, Amýrdegi Komsomol, Qaraǵandy, Atyraý (Gýrev), Máskeý, Almaty jáne Astana qalalarynda áskerı mindetin abyroımen atqaryp, qarapaıym sarbazdan general-maıor dárejesine deıin kóterildi.
Ámirbek Tógisov Ferǵana óńirinde, Taýly Qarabaq pen Baltyq jaǵalaýyndaǵy aımaqtarda bolǵan tótenshe jaǵdaılarda qoǵamdyq tártipti saqtaý sharalaryna qatysqan.
1992 jyly Máskeýde, KSRO İshki ister mınıstrliginiń İshki áskerler Bas basqarmasynda qyzmet etip júrgen jerinen týǵan eline oralyp, Qazaqstan Respýblıkasy İshki áskeri qolbasshysynyń orynbasary bolyp qyzmet istedi. 1996 jylǵa deıin atalǵan qurylymdy qalyptastyrý men damytýǵa belsene atsalysty. Sol eńbegi úshin oǵan 1996 jyly general-maıor áskerı ataǵy berildi.
1997 jyly Prezıdent Jarlyǵymen Qazaqstan Respýblıkasy Qorǵanys mınıstriniń orynbasary bolyp taǵaıyndaldy. Bul qyzmette júrip, Ámirbek Tógisov elimizdiń halyqaralyq áskerı áriptestigin nyǵaıtýǵa eleýli úles qosty.
Ol BUU otyrysynda bitimgershilik qyzmet týraly baıandama jasap, Qazaqstannyń bedelin álem aldynda tanyta bildi. Sondaı-aq, alǵashqy «Sentrazbat-97» bitimgershilik oqý-jattyǵýyn uıymdastyrý men ótkizýge belsene qatysty.
General-maıor Tógisovtyń eren eńbegi laıyqty baǵalanyp, birneshe medaldar men «Aıbyn» ordeniniń ıegeri atandy.