Bul týraly Syrtqy ister mınıstrliginiń resmı ókili Aıbek Smadıarov aıtty.
Qazaqstannyń Iordanıa men Mysyrdaǵy Elshilikteri Gaza sektoryndaǵy ahýaldyń asqynýynyń alǵashqy kúninen bastap bizdiń otandastarymyzdy «Rafah» baqylaý-ótkizý pýnkti (BÓP) arqyly shyǵarý, olardy odan ári tasymaldaý, sondaı-aq shet memleketterdiń shekarasynan ótý úshin tıisti qujattarmen qamtamasyz etý boıynsha járdem kórsetý máselelerin pysyqtaýda, dep habarlaıdy Almaty-akshamy.kz.
Qaqtyǵys aımaǵyndaǵy QR azamattary men olardyń jaqyn týystarynyń tizimin qalyptastyrý, ony kelisý jáne únemi jańartyp otyrý jónindegi mindetterge erekshe nazar aýdarylady
Qazaqstannyń Kaırdegi Elshiligi kún saıyn Mysyrdyń Syrtqy ister mınıstrligimen jáne basqa da quzyretti organdarymen azamattarymyzdy evakýasıalaý sharttary týraly kelissózder júrgizedi.
Gaza sektorynyń ereksheligin eskere otyryp, anklavta turatyn azamattarmen jedel ózara is-qımyl jasaý maqsatynda messendjerde turaqty negizde arnaıy chat ashylǵan. Atalǵan shıelenis bastalǵan kezden bastap árbir azamatpen olardyń ornalasqan jeri men densaýlyq jaǵdaıyn naqtylaý úshin tikeleı baılanys júrgiziletinin atap ótemiz.
Qazaqstannyń Iordanıa men Mysyrdaǵy elshilikteri osy elderdiń Syrtqy ister mınıstrlikterimen, sondaı-aq Palestınalyq bosqyndarǵa kómektesý jáne jumystardy uıymdastyrý úshin BUU Taıaý Shyǵys agenttigi (BAPOR), Halyqaralyq kóshi-qon uıymy sıaqty osy aımaqtaǵy halyqaralyq uıymdardyń keńselerimen turaqty baılanysta. Sonymen qatar, Palestınanyń Qazaqstandaǵy jáne Mysyrdaǵy Elshilikterimen qujattardy tekserýge qatysty keıingi jumystar boıynsha ýaǵdalastyqtar bar.
«Ózderińiz biletindeı, aǵymdaǵy jyldyń 1 qarashasynda Gaza sektorynan sheteldik azamattar men qos azamattyǵy bar palestınalyqtardy evakýasıalaý bastaldy. Alaıda, ókinishke oraı, 4 qarashadan bastap «Rafah» BÓP arqyly sheteldikter men jaralylardy evakýasıalaý ýaqytsha toqtatyldy.
Mysyr jáne Izraıl taraptarynyń talaptaryna sáıkes ár elge «Rafah» BÓP arqyly sheteldik azamattardyń ótýi boıynsha belgili bir kún beriledi. Bul rette aǵymdaǵy ótkizý qabileti (táýligine 500-ge jýyq adam), sondaı-aq shamamen 45 eldiń elshilikteri usynǵan tizimdegi adamdardyń jalpy sany eskeriledi, bul shamamen 7000 adam.
Búgingi tańda Gaza sektorynda bizdiń derekterimiz boıynsha QR 76 azamaty bar. Otbasy múshelerimen birge sanaǵanda olardyń sany 161 adam. Sonymen qatar, sheteldik azamattardyń otbasy músheleriniń shyǵýyna baılanysty Mysyr tarapynan jáne Izraıl tarapynan da belgili bir talaptar bar. Mysaly, úshten bir bóligi evakýasıalaýǵa, ıaǵnı joǵaryda atalǵan talaptarǵa sáıkes kelmeıdi. Bul kámeletke tolǵan balalar, erli-zaıyptylar, nemereler jáne balalardyń jubaılary. Osyǵan oraı, bizdiń keıbir azamattarymyz otbasy múshelerin alyp ketý múmkindigi bolmaǵandyqtan Gaza sektorynan ketýge daıyn emes.
Biz Qazaqstan azamattaryn evakýasıalaýyn múmkindiginshe tezirek jasaý úshin barlyq kúsh-jigerimizdi salyp jatyrmyz. Degenmen, kóp nárse bizge baılanysty emes. Bul áskerı-dıplomatıalyq daǵdarysty búkil álem sheshýge tyrysyp jatyr.
Óz tarapymyzdan tolyq daıynbyz – azamattarymyz Mysyr shekarasynan ótkennen keıin arnaıy evakýasıalyq bort Kaırge ushyp shyǵady.
Shetelde Qazaqstan azamattarynyń quqyqtary men múddelerin qorǵaý QR Syrtqy ister mınıstrligi men Elshilikteriniń negizgi mindetteriniń biri. Aldyn alý sharalaryn qabyldaý úshin biz Taıaý Shyǵys óńirdegi jaǵdaıdy baqylap otyrmyz, ókinishke oraı, onyń shıelenisi kúsheıip keledi», - dedi mınıstrliktiń resmı ókili.