Sarybaı bı aýyly – Almaty oblysyndaǵy Jambyl aýdanyna qarasty eldimekenniń biri
Gaz qubyryn júrgizýdiń ózi 1 mıllıon teńgege jýyqtady. Osylaı dep nalyǵan kópbalaly otbasy jylýǵa zárý, dep habarlaıdy Almaty-akshamy.kz Almaty.tv-ge silteme jasap.
Kámeletke tolmaǵan 4 balanyń anasynyń aıtýynsha, kógildir otynǵa qosylý úshin merdigerler aspandaǵy baǵany suraıdy.
Úıdi 7 jyldan beri kómir jaǵyp jylytyp kelgen kópbalaly otbasy otaǵasynan aıyrylǵaly kógildir otynǵa zárý. Al gaz qubyryn ótkizetin merdigerler túrli sebepterdi aıtyp, jalǵyzbasty ananyń shashy jetpeıtin qunyn suraǵan. Sodan beri úshinshi aı 34 jastaǵy kelinshek mekemeniń tabaldyryǵyn tozdyrýmen keledi.
«Mıllıon bolyp tur. 975 myń teńge boldy. 385 myń gazǵa, 390 myń qubyr tartqanǵa, 200 myń tez kirgizgenge. Kálkýlátormen eseptep turyp shyǵaryp berdi. Men 385 myńyn tóleıin desem, kelispedi. 100 metrge ústinen qosymsha tóleý keregin aıtty», – dedi jalǵyzbasty ana Gúlsaıa Tanekeeva.
Otaǵasynyń qazasynan keıin onsyz da turmystyq jaǵdaıy tómendegen bul otbasyna baǵa qymbat. Sebebi Gúlsaıanyń aılyǵy shaılyǵynan aspaıdy. Al úkimetten beretin járdemaqy balalardyń mektep kıiminen, kerek-jaraǵynan artylmaıdy eken.
«390 myńdy tóleı alsam, gaz qashan kiredi dep suradym. «Joq. Ústinen taǵy 200 myń qos» deıdi. Tez kirgizý úshin. Sonda jumysyna surap tur ǵoı. Meniń ondaı aqsham joq», – dedi jalǵyzbasty ana Gúlsaıa Tanekeeva.
Alaıda merdigerlerdiń ózi muny joqqa shyǵardy. Odan bólek, bul otbasyna kómek retinde jeńildikter jasaý máselesin qarastyratyndaryn aıtty. Al buǵan deıin ne sebepti mardymdy jaýap berilmeı kelgenin úlken basshysynyń issaparda júrýimen baılanystyrdy.
«3-4 kún ishinde basshymyz keledi. Sol kisimen aqyldasyp, ózin de shaqyryp jeńildik pen kómek beremiz. Biz endi bul aýdanda 2009 jyldan beri jumys isteımiz. Talaı jaǵdaıy joq otbasyna, múgedekterge jeńildik berdik», – dedi «Táýekel-gaz qubyry» JSHS dırektory Qazbek Ǵabıden.
Aıta ketsek, kópbalaly otbasy turyp jatqan Sarybaı bı aýyly – Almaty oblysyndaǵy Jambyl aýdanyna qarasty eldimekenniń biri. Jergilikti ákimdik dereginshe, mundaǵy 816 shańyraq bar. 510 úı kógildir otynǵa qosylǵan. Al jalǵyzbasty ana tútinin tútetip otyrǵan shańyraqqa qashan jylý qashan kireri ázirge belgisiz.