Almatyda atalyp ótken "Aqjelken" balalar basylymynyń 100 jyldyǵy qarsańynda súıinshi jańalyq jarıa boldy, dep habarlaıdy aqshamnews.kz tilshisi.
Bul jańalyq - 1 ǵasyr boıy arhıvte jatqan, arab qarpimen jazylǵan Júsipbek Aımaýytulynyń buryn-sońdy esh jerde jarıalanbaǵan «Balalarǵa áńgime» dep atalatyn áńgimeler toptamasynyń tabylýy.
Jýrnaldyń 1925 jyly Orynborda «Pıoner» degen atpen jaryq kórgen eń alǵashqy sanyna «Jik» degen búrkenshik atpen jarıalanǵan jazýshynyń bul shyǵarmalaryn redaksıa tilshisi Aınur Muratova Almatydaǵy Ulttyq kitaphanadan tapqan.
"Jýrnalymyzdyń 1925-1939 jyldar aralyǵyndaǵy nómirlerine sholý jasaý barysynda 1 ǵasyr boıy arhıvte jatqan arab qarpimen ıaǵnı tóte jazýmen jazylǵan Júsipbek Aımaýytulynyń buryn-sońdy esh jerde jarıalanbaǵan «Balalarǵa áńgime» dep atalatyn áńgimeler toptamasyn taptyq.
Jazýshynyń bul shyǵarmalary qazirgi «Aq jelken» jýrnalynyń 1925 jyly Orynborda «Pıoner» degen atpen jaryq kórgen eń alǵashqy sanyna «Jik»degen búrkenshik atpen jarıalanypty.
Júz jyl boıy rasymen de mundaı qazyna ǵylymı turǵyda zerttelmeı jatýy, Júsipbek Aımaýytuly shyǵarmalary jınaqtalǵan kitaptarǵa enbeýi múmkin emes dep, kitaphanalardaǵy Júsipbek Aımaýytuly shyǵarmalary jınaqtarynyń birin qaldyrmaı qarap shyqtym. Biraq dál «Pıoner» jýrnalynyń 1 sanyna shyqqan áńgimeler toptamasyn esh jerden kezdestirmedim. Bul shyǵarmany Júsipbek shyǵarmashylyǵyn tereń zerttep júrgen jazýshy, júsipbektanýshy Nurjan Qýantaıulyna usynyp, ǵylymı saraptamadan ótkizýin ótindim. Ǵalym jan-jaqty zerdelep, shyǵarmanyń shynymen de Júsipbek Aımaýytulynyń qalamynan týǵanyn rastap berdi.
Osylaısha, ǵasyrlyq tarıhtyń tasasynda qalyp kelgen derekter jańǵyryp, «Aq jelken» jýrnalynyń shynaıy shejiresi ǵylymı negizde qaıta túzilip jatyr. Zertteý barysynda Qyzylorda qalasynyń arhıvine jáne Reseı men Ózbekstandaǵy arhıvterge suraý salyp, qosymsha derekkózder izdestirdim. Alaıda 1925 jyly jaryq kórgen «Pıoner» jýrnaly ol jaqtardan tabylmady. Elimizdegi arhıvterdi qarap, sońynda jýrnaldyń eń alǵashqy nómirin Almatydaǵy QR Ulttyq kitaphanasynyń Sırek kitaptar jáne qoljazbalar bóliminen taptyq. Bir ǵana nómiri saqtalypty", dedi "Aqjelkenniń" tilshisi Aınur Muratova.