Búgin Uly Otan soǵysynyń ardageri, Memleket jáne qoǵam qaıratkeri Sháńgereı Jánibekuly JÁNİBEKOV 100 jasqa toldy.
Ǵasyr jasaǵan qarıany mereıtoıymen quttyqtap, qurmet kórsetýge Medeý aýdany ákiminiń orynbasary Aıdos Nurlybaev, Almaty qalasy Ardagerler keńesiniń tóraǵasy Aqan Bıjanov, Qazaqstan Respýblıkasy Qorǵanys mınıstrliginiń ókilderi, zamandastary men balalary keldi, dep habarlaıdy Almaty-akshamy.kz
Áskerı orkestrdiń súıemeldeýimen týǵan kún ıesin qarsy alǵan qonaqtar ǵasyr kýágerine izgi tilekter aıtyp, gúl shoqtary men táttiler salynǵan sebetter tartý etti.
Kesh shymyldyǵyn Almaty qalasy Ardagerler keńesi tóraǵasy Aqan Bıjanov ashyp, qart maıdangerdi týǵan kúnimen quttyqtady.
– Ǵasyr jasap, kópti kórgen qarıasyz. Sonaý soǵystyń zulmat jyldary etigińizben qan keship, eren erligińizben Otanymyzdy qorǵadyńyz. Sizdeı batyrlarymyzdyń arqasynda búgingi jas urpaq kók aspan men kók Týdyń astynda beıbit ómir súrip keledi. Sol óshpes erlikterińiz úshin aldyńyzda bas ıemiz. Sizdiń ómir jolyńyz, eńbekpen órilgen tabysty da jemisti qyzmetińiz jastarǵa úlgi. Júz jas – Allanyń bergen syıy, eńbegińizdiń zeıneti. Almatylyq ardagerler atynan Sizdi týǵan kúnińizben quttyqtaımyz, - dedi A.Bıjanov.
Sháńgereı Jánibekov 1924 jyly 15 maýsymda Qostanaı oblysy, burynǵy Denısov aýdany, Krasnoarmeıski okrýgy Qarpyq aýylynda dúnıege kelgen.
II dárejeli Otan soǵysy, Eńbek Qyzyl Tý, Oktábr Revolúsıasy, Halyqtar dostyǵy ordenderiniń ıegeri otstavkadaǵy gvardıa polkovnıgin.
Ol maıdanǵa 1943 jyldyń jazynda Týla oblysynda kirdi. Oǵan deıin ol Qostanaıdaǵy medısınalyq tehnıkýmdy bitirip, oqý polkinde áskerı feldsher bolyp merzimdi qyzmet atqardy.
Ǵylym men mádenıetti, ádebıet pen ónerdi damytýǵa, eldiń rýhanı jáne zıatkerlik áleýetin arttyrýǵa qosqan baǵa jetpes úlesi úshin Sháńgereı Jánibekov «Parasat» jáne «Qurmet» ordenderimen marapattalǵan.
Saltanatty basqosýda Qazaqstan Respýblıkasynyń Qorǵanys mınıstri R.Jaqsylyqovtyń, Qazaqstan Respýblıkasy Qarýly kúshteri desanttyq-shabýyldaý áskerleriniń qolbasshysy A.Djýmakeevtiń, Qostanaı oblysynyń ákiminiń quttyqtaý hattary oqylyp, tabystaldy.
İs-shara sońynda mereıtoı ıesi Sháńgereı ata ózine kórsetilgen qurmet úshin rızashylyǵyn bildirip, aq batasyn berdi.