Ǵaryshta Qazaqstannyń 6 jer serigi qalyqtap júr. Ekeýi baılanysqa jaýap beretin «Kazsat». Eki apparat jerdi qashyqtan zondtaıdy jáne «KazSTsat» dep atalatyn eki spýtnık ǵylymı derekter jınaqtaıdy,-dep habarlaıdy Almaty-akshamy.kz qazaqstan.tv-ge silteme jasap.
Týra osylaı ulttyq arnanyń aqparatyn kórip otyryp oılanyp kórdińiz be? Mynadaı teledıdaryńyz sıgnaldy qaıdan alady? Myńdaǵan shaqyrym jerdegi ortalyqpen qaılaı baılanysady? Baılanystyń barlyq túri, telearnalar, ınternet, memlekettik tipti áskerı baılanys ta Aqkól qalasynda ornalasqan osy ǵaryshtyq basqarý ortalyǵy arqyly retteledi. Naqtyraq aıtsaq, Qazsat-2 jáne Qazsat-3 jer serikteri ózimizdi aqparattyq júıemen tolyq qamtamasyz etip otyr.
Sondyqtan bul eki jer serigin Qazaqstannyń qulaǵy dep ataıdy. Basqarýdy, aqparat alýdy tolyq qazaqstandyq mamandar meńgergen Ekeýi de shamamen 70 paıyzdyq júktemede jumys istep jatyr. Iaǵnı, bizdiń mamandar kórshi elderge spýtnıktik qyzmetterdi eksporttaı alady.
- Tek qana Qazaqstan emes sonymen qatar Qyrǵyzstannyń aýmaǵyn qamtımyz, 1-2 baılanys operatorymen jumys isteımiz. Sonymen qatar byltyr Tájikstan Respýblıkasynyń eki kompanıasymen kelisimshartqa otyrdyq. Qazirgi kezde bir kompanıasymen tolyqtaı jumys jasaýdamyz, - deıdi «Aqkól» RǴBO jetekshi ınjeneri Dıdar Zarqumov.
Qazsat Qazaqstannyń qulaǵy bolsa, QazEOsat - kózderi. Sebebi bul jer serikteri jer bederin alystan zondttaıdy, ıaǵnı sýretke túsiredi. Myna obektıv arqyly túsirilgen sýretter ár salada paıdalanylady. Aýyl sharýashylyǵy, tótenshe jaǵdaılar, tipti ákimdikter de osy fotosýretterdi paıdalanyp jumystaryn júrgizedi eken. Máselen, mynaý Shardara sý qoımasynyń tasyǵan kezinde jasalǵan sýretter. Qaı eldi mekenderdi sý basqanyn, tasqyn qaı baǵytta júrgenin tolyq kórýge bolady. Qostanaı oblysynda bolǵan órt kezinde de spýtnıktik sýretter órt sóndirý jumystaryn jeńildetken.Tipti jer serikteri memlekettik organdardyń jalǵan aqparat taratpaýy men jemqorlyqpen kúreske de kómektese alady.
- Qansha orman alqaby shabyldy, qansha naqty aýyl sharýashylyǵy daqyldary egildi - sonyń barlyǵy ınstrýmentalda túrde ólshengen derekter bolyp tabylady. Oblystardan kelip jatqan saraptamalyq derekterge qosymsha aqparat bolyp tabylady. Ǵylymı zertteý baǵytynda ushyrylǵan taǵy eki spýtnıgimiz bar. Onyń birin qazaqstandyq "Ǵalam" kompanıasy qurastyrǵan. Búginde jumysyn múltiksiz oryndap jatyr, - deıdi «Qazaqstan ǵarysh sapary» UK» AQ departament dırektorynyń orynbasary Berik Rahymjanov.
Qazir ǵylym men tehnologıanyń damyǵan zamanynda barlyǵy ǵalamtorǵa, ıaǵnı ǵaryshqa baılanǵan. Al, memlekettik deńgeıdegi qupıa aqparattar ózgeniń qoly arqyly osyndaı jer serikteriniń bolýy Qazaqstan úshin asa mańyzdy. Bul aqparattyq qaýipsizdik úshin qajet dúnıe.