Oqý-aǵartý mınıstrligi Memleket basshysynyń tapsyrmasymen 2023 jyldan bastap prezıdenttik Jastar kadrlyq rezerviniń úlgisi boıynsha bilim berýdegi ózgeristerdiń kóshbasshylaryn irikteý jáne daıarlaý jónindegi jobany iske asyrýda.
Búgin Astanada «Bilim berýdegi jańa ózgeristerdiń 1000 kóshbasshysy» jobasy aıasynda irikteýden sátti ótken úmitkerlerge sertıfıkat tapsyrý rásimi ótti.
Oqý-aǵartý mınıstri Ǵanı Beısembaev kadrlyq rezervke ótken úmitkerlerge arnaǵan sózinde otandyq bilim sapasyn arttyrý jáne pedagog kadrlardy kásibı daıarlaý jónindegi negizgi baǵyttarǵa nazar aýdardy.
«Ótken jyldyń basynda Oqý-aǵartý mınıstrligi elimizdegi bilim sapasyn odan ári arttyrý úshin 5 negizgi baǵytty aıqyndady. Olardyń ishinde menedjmentti nyǵaıtý jáne kadrlyq rezervti qalyptastyrý da bar. Memleket basshysynyń tapsyrmasy boıynsha biz «1000 ózgerister kóshbasshysy» jobasyn iske qostyq. Bul - otandyq bilim júıesin damytýdyń jańa kezeńi. Segiz aıdyń ishinde sizder irikteýden ótip, jeke, kásibı, basqarýshylyq, analıtıkalyq daǵdylar men quzyretterińizdi damyttyńyzdar. Endi Sizder naǵyz kóshbasshylar retinde elimizdegi bilim berý júıesiniń sapasyn arttyrýǵa óz úlesińizdi qosýlaryńyz kerek. Eń bastysy - balalarymyz ben pedagogterimizge jaıly jáne qaýipsiz orta qalyptastyrý», - dedi Ǵanı Beısembaev.
Jobanyń bastapqy kezeńinde barlyǵy 8068 ótinim berildi. Úmitkerler quzyrettilikti baǵalaý, úsh deńgeıli oqytý, elimizdiń jetekshi mektepterinde taǵylymdamadan ótý, qorytyndy baǵalaý jáne mınıstrlik janyndaǵy komısıamen áńgimelesýden ótti.
Barlyq bes kezeńniń qorytyndysy boıynsha Respýblıkalyq kadr rezervine 208 kandıdat kirdi. Olardyń arasynda Astana qalasyndaǵy A. Seıdimbek atyndaǵy №54 mektep-lıseı dırektorynyń oqý-tárbıe isi jónindegi orynbasary Qaırat Muqashev ta bar.
«Jobaǵa qatysý - meniń basqarý tásilimdi túbegeıli ózgertti. Men balalarymyzǵa qolaıly jaǵdaı jasaý jáne ujymmen birge qaı baǵytta damıtynymyz týraly oılana bastadym. Eń bastysy, meniń oıymsha, bul joba áriptesterimniń bolashaqqa jáne óz kúshterine degen senimin arttyrdy», - dep atap ótti úmitker.
Rezervke alynǵan jańa býyn menedjerleri elimizdegi kadr tapshylyǵy máselesin sheshýge yqpal etedi. Sondaı-aq, jańa mektepterdi, onyń ishinde «Jaıly mektep» ulttyq jobasy sheńberinde salynyp jatqan mektepterdi basqarýǵa jiberiledi. Úmitkerlerdi irikteý jáne biliktiligin arttyrý boıynsha is-sharalardy NZM BBU «Pedagogıkalyq sheberlik ortalyǵy» ótkizdi.