Oqý-aǵartý mınıstrliginiń janynan bilim berý salasyndaǵy memlekettik saıasatty damytýǵa baǵyttalǵan keshendi sheshimder ázirleý maqsatynda 2023 jyly Ardagerler keńesi qurylǵan bolatyn.
Mundaı keńester elimizdiń barlyq óńirindegi bilim basqarmalary janynda da jumys jasaýda. Olardyń quramyna bilim salasynda uzaq jyldar qyzmet atqarǵan zeınettegi ustazdar, qoǵam jáne memleket qaıratkerleri engen, dep habarlaıdy aqshamnews.kz Oqý-aǵartý mınıstrligine silteme jasap.
Keńes otyrysynda bilim sapasyn arttyrý jáne tárbıe jumysyn kúsheıtýge baǵyttalǵan mańyzdy máseleler qaraldy. Mınıstr sondaı-aq, jas pedagogterge tálimgerlik kórsetý, kásibı tájirıbe sabaqtastyǵy, bala tárbıesindegi otbasy men qoǵamnyń róli sekildi negizgi basymdyqtardy atap ótti.
«Sizder otandyq bilim berý júıesiniń damýyna zor úles qostyńyzdar. Búgin bizdiń aldymyzda – qarqyndy damyp jatqan zamanda eldiń jańa býynyn tárbıeleý mindeti tur. Ardager ustazdar – bizdiń qazynamyz. Uzaq jyldar mol tájirıbesi bar áriptesterimizdiń kásibı kómegine senim artamyz. Birlesken kúsh-jigerimizben balalarymyz úshin barynsha jaqsy jaǵdaı jasaımyz dep senemin», – dedi Ǵanı Beısembaev.
Mınıstr Ardagerler keńesiniń qoǵamdaǵy rólin nyǵaıtý maqsatynda óńirlik bilim basqarmalarynyń basshylaryna olardyń pedagogıkalyq ujymdarmen kezdesýlerin uıymdastyrýdy tapsyrdy.
«Biz óz bilimimizben, tájirıbemizben bólisýge árdaıym daıynbyz. Ortaq maqsatymyz – myqty da adal urpaq tárbıeleý. Bilim salasynyń damýyna shyn janashyrlyqpen alańdap otyramyz. Ustaz retinde el bolashaǵyna beı-jaı qaraı almaımyz. Urpaq tárbıeleý isine belsene aralasý – bizdiń azamattyq boryshymyz», – dedi keńes múshesi, qoǵam qaıratkeri Kúlásh Shámshıdınova.
Sondaı-aq jıynda pedagog mamandyǵyn, ustazdar áýletterin dáripteý týraly usynystar aıtyldy. Keńes otyrysy bilim berý salasyndaǵy ózekti máselelerdi talqylap, tájirıbe almasýǵa arnalǵan tıimdi alańǵa aınaldy.