26 aqpan kúni QR Oqý-aǵartý mınıstri Ǵanı Beısembaev Qazaq ulttyq qyzdar pedagogıkalyq ýnıversıtetinde profesor-oqytýshylar quramy men stýdentterimen kezdesti. Jıyn barysynda pedagog kadrlaryn sapaly daıarlaý, bilim berý baǵdarlamalaryn jetildirý jáne úzdiksiz pedagogıkalyq bilim berý júıesin damytý máseleleri talqylandy, dep habarlaıdy aqshamnews.kz
Mınıstr óz sózinde pedagogıkalyq mamandyqtarǵa bólinetin memlekettik granttardyń jyl saıyn artyp kele jatqanyn atap ótti. Onyń aıtýynsha, bıyl 48 myńǵa jýyq túlek pedagogıkalyq mamandyqtar boıynsha joǵary oqý oryndaryn támamdaǵan.
«Memleket pedagog kadrlarynyń sapasyn arttyrýǵa erekshe mán berýde. Sonyń bir dáleli – sońǵy bir jylda úsh ustazǵa Qazaqstan Respýblıkasynyń Eńbek Eri ataǵy berildi. Bul – memleket pen Prezıdenttiń ustazdarǵa degen joǵary seniminiń kórinisi. Ustazdyń eń basty ustanymy – shákirtterine sapaly bilim, sanaly tárbıe berý. Stýdentterge osy ýnıversıtetten shyqqan Aıagúl Mırazova men Gúljanar Nurpeıisova sıaqty pedagogıkalyq qyzmettiń bıik shyńyna jetýlerine tilektespin», – dedi Ǵanı Beısembaev.
Mınıstrdiń aıtýynsha, sońǵy jyldary zertteý jumystarymen aınalysatyn pedagogterdiń úlesi 1,6 esege ósip, magıstr dárejesi bar muǵalimderdiń sany rekordtyq 27,9 myńǵa jetken.
Stýdentter mınıstrmen kezdesýde aýyldyq jerlerdegi pedagogterdi qoldaý, jumysqa ornalasý, ata-analar qaýymdastyǵymen ózara árekettesý jáne «Birtutas tárbıe» baǵdarlamasy aıasyndaǵy tárbıe jumystary jóninde suraqtar qoıyp, naqty jaýaptar aldy.
Kezdesý aıasynda Qazaq ulttyq qyzdar pedagogıkalyq ýnıversıtetinde elimizdiń úzdik pedagogteriniń qurmetine «Ult kelbeti – ustazdar» atty fotogalereıa ashyldy. Saltanatty rásimge Ǵanı Beısembaev, ýnıversıtet rektory Gúlmıra Qanaı jáne QyzPU túlekteri, tanymal pedagogter Aıagúl Mırazova men Gúljanar Nurpeıisova qatysty.
Fotogalereıada eldiń bilim salasyna zor úles qosqan kórnekti ustazdardyń beıneleri usynylǵan. Olardyń qatarynda Sosıalısik Eńbek Eri, qazaq tili men ádebıeti pániniń muǵalimi Marjan Tasova, Qazaqstannyń Eńbek Eri, bıologıa pániniń muǵalimi Alına Soloveva, sondaı-aq QyzPU túlegi, Qazaqstannyń tuńǵysh Eńbek Eri, Qazaqstannyń eńbek sińirgen qaıratkeri Aıagúl Mırazova bar.
«Fotogalereıa – barlyq ustazǵa degen qurmettiń belgisi. Biz ótkenimizdi bilmesek, bolashaǵymyzdy baǵdarlaı almaımyz. Ustazdyń júregi de, sózi de jyly bolýy kerek. Ustaz bolý – úlken jaýapkershilik. Sol jaýapkershilikti abyroımen atqarǵan jan ǵana naǵyz ustaz bola alady. Osyndaı ardaqty ustazdarymyz kóp bolsyn, fotogalereıanyń qatary tolyǵa bersin», – dedi Aıagúl Mırazova.
Sonymen qatar kezdesý aıasynda Qazaq ulttyq qyzdar pedagogıkalyq ýnıversıtetiniń birqatar oqytýshysyna «Eńbek ardageri» medali, «Ybyraı Altynsarın» tósbelgisi, QR Oqý-aǵartý mınıstrliginiń «Bilim berý isiniń qurmetti qyzmetkeri» tósbelgisi, Qurmet gramotasy jáne Alǵys hattar tabystaldy.