Erbolat Dosaev «Halyq qatysatyn búdjet» baǵdarlamasy aıasynda júrgizilgen Gandı atyndaǵy saıabaqty abattandyrýdy tekserdi, der habarlaıdy Almaty-akshamy.kz
Almaty ákimi Erbolat Dosaev Almaly aýdanyn aralaý barysynda Gandı atyndaǵy saıabaqqa at basyn burdy. Qala basshysy «Halyq qatysatyn búdjet» aıasynda qolǵa alynǵan saıabaqtaǵy abattandyrý jumysynyń barysyn qadaǵalady.
Jambyl – Jarokov – Shevchenko – Gagarın kósheleriniń aýmaǵyndaǵy jaqyn mańdaǵy úılerdiń turǵyndary jaryqty retteý, jol tósemin qalpyna keltirý jáne oıyn alańdaryn retke keltirý týraly bastama kóterdi. Olar úshin Gandı saıabaǵy bos ýaqyt ótkizýge, demalýǵa taptyrmas basty oryn. Saıabaqqa kún saıyn 2 myńnan astam adam keledi. Oıyn alańdary men vorkaýtty jańartý, demalys aımaqtaryn, saıabaqta júgirý joldaryn jasaý jónindegi usynystardy «Halyq qatysatyn búdjet» baǵdarlamasynda daýys berý kezeńinde qala turǵyndary belsendi qoldady.
Saıabaqqa barǵan kezde Almaly aýdanynyń ákimi Aıdar Jaqybaev qala basshysyna jumystyń úsh baǵytta júrgizilgeni týraly baıandady. 80%-ǵa saıabaqta kógaldandyrý boıynsha mindetter oryndaldy, kabeldik jeliniń jáne jaryqtandyrý tirekteriniń zaqymdanýyn aýystyrý aıaqtalyp keledi. Abattandyrý jumystarynyń daıyndyǵy 90%: saıabaqta átkenshegi bar 17 pergola, jaryq tartylǵan 6 besedka, 3 shahmat ústeli, 5 aýyz sý burqaǵy ornatylǵan. Sonymen qatar, aýdan ákiminiń aıtýynsha, turǵyndarǵa yńǵaıly bolý úshin ıtterdi serýendetýge arnalǵan aımaq iri jáne kishi tuqym úshin bólinip jasaldy. Saıabaqtaǵy jumysty osy jyldyń 15 qarashasynda tolyq aıaqtaý josparlanyp otyr, nysanǵa 90 adam jumyldyryldy.
Saıabaqty aralaý barysynda aýdan turǵyndary Almaty ákimine kishkentaı balalarǵa arnalǵan balalar alańyn beıimdeý týraly ótinish bildirdi. Barlyǵy bıik, ata-analar balalarynyń qaýipsizdigine alańdaıdy. «Bizdiń ártúrli jastaǵy balalardy biriktirgen tájirıbemiz bar. Aımaqtardy bólý qajet», - dedi Erbolat Dosaev. Qala basshysy aýdan ákimine osy máseleni pysyqtaýdy tapsyrdy. Sonymen birge, Erbolat Dosaev saıabaqqa kelýshiler úshin yńǵaıly soqpaqtardy qarastyrý qajettigine nazar aýdardy.
Qalada turǵyndardyń demalysy úshin ashylǵan taǵy bir jobany Almaty ákimi jumys sapary kezinde aralady. Áýezov aýdanyndaǵy Jandosov kóshesiniń ońtústiginde jáne Súleımenov kóshesiniń shyǵysynda jaıaý serýendeý aımaǵyn abattandyrý aıaqtaldy. Joba «Halyq qatysatyn búdjet» baǵdarlamasy aıasynda júzege asyryldy. Búkil aýmaq jaryqtandyrylyp, jasyl jelekterdi avtomatty sýarý júıesi ornatyldy.
Anyqtama úshin: Endigi kezekte Álıa Moldaǵulova men Mánshúk Mámetova eskertkishi bar skverler, Áýezov atyndaǵy Qazaq ulttyq drama teatrynyń jáne Ǵ. Músirepov atyndaǵy balalar men jasóspirimder teatrynyń janyndaǵy sýburqaqty rekonstrýksıalaý kútip tur.