Erbolat Dosaev Almaly aýdanyndaǵy sorǵy stansıasynyń jóndeý jumystarynyń barysyn tekserdi
Almaty ákimi Erbolat Dosaev Almaly aýdanyna jumys sapary barysynda Tóle bı – Áýezov - Áıteke bı – Aıtıev kósheleriniń aýmaǵyndaǵy sorǵy stansıasyn jóndeý jumystarynyń barysymen tanysty.
40 jyl buryn salynǵan sorǵy stansıasy 553-ten astam abonentterdi sýmen qamtamasyz etedi. Turǵyndar sýdyń jıi ajyratylatynyna jıi shaǵymdandy: 4 sorǵynyń 1-i ǵana jumys isteıdi. Aǵymdaǵy jyly nysanda 15 apat oryn aldy.
Almaly aýdanynyń ákimi Aıdar Jaqybaevtyń aıtýynsha, sorǵy stansıasynda jóndeý jumystary 1997 jyldan beri júrgizilmegen. 2018 jyly nysan ıesiz dep tanylyp, energetıka jáne sýmen jabdyqtaý basqarmasynyń balansyna berildi. Qanaǵattanǵysyz jaǵdaıy saldarynan sorǵy stansıasy qyzmet kórsetý úshin "Almaty Sý" MKK-ǵa berilmedi.
Erbolat Dosaevtyń tapsyrmasy boıynsha aǵymdaǵy jyly sorǵy stansıasynda jóndeý jumystary bastaldy. Búginde eski jabdyq pen shatyrdy bólshekteý aıaqtaldy, shatyr men irgetasty gıdrooqshaýlaý júrgizildi, syrtqy oqshaýlaý jáne qasbettiń qaptamasy jasaldy. Aýdan ákimi qalpyna keltirý jumystary barysynda sýmen jabdyqtaý turaqty bolǵanyn atap ótti.
Qala basshysy osy aýdanda úzdiksiz sý berý úshin nysandy merziminde aıaqtaýdy tapsyrdy. "Biz nysandy modernızasıalaý aıaqtalǵansha kútemiz jáne ony qalalyq júıeniń bir bóligi retinde qala balansyna alamyz", - dedi Erbolat Dosaev.
Qazirgi ýaqytta nysanda jabdyqtardy montajdaý jáne energıamen jabdyqtaý, abattandyrý jumystary jalǵasýda. Rekonstrýksıalaýdy aǵymdaǵy jyldyń 15 jeltoqsanynda aıaqtaý josparlanýda. Magıstraldy jáne taratý jelilerin júrgize otyryp, káriz jáne sorǵy stansıasyn jóndeý boıynsha uqsas jumystar "Panorama" TK-de de júrgiziledi . Olardy aǵymdaǵy jyldyń jeltoqsan aıynyń ortasyna deıin aıaqtaý josparlanýda.
Aralaý barysynda Almaly aýdanynyń turǵyndary qala basshysyna jaıaý júrginshiler ótkeli týraly ótinishpen júgindi. Erbolat Dosaev aýdan ákimine kelesi jyly jergilikti turǵyndardyń qaýipsizdigi úshin retteletin ótkel ornatý múmkindigin qarastyrýdy tapsyrdy. Sondaı-aq, Nurmaqov-Qarasaı batyr kósheleriniń qıylysynda shlagbaým ornatý, ǵımarattardyń qasbetin jóndeý jáne kólik aǵyndaryn retteý máseleleri qozǵaldy. Olardyń barlyǵy beıindi vedomstvolardyń baqylaýyna alyndy.