Tyń tehnologıanyń arqasynda syrtqa satylatyn metalýrgıalyq ónimniń bul túrine degen suranys arta túspek.
Sáıkesinshe, baǵasy 15 ese qymbattamaq. Qazirdiń ózinde quramy taza selen óndirý jumysy bastalyp, iri kásiporyndarda arnaıy sehtar ashylyp jatyr, dep habarlaıdy Almaty-akshamy.kz Qazaqstan.tv-ǵa silteme jasap.
Selen medısına, shyny óndirisi jáne elektronıka syndy mańyzdy salalarda keńinen qoldanylady. Sondyqtan da oǵan degen suranys joǵary. Dese de, osy kezge deıin elimizde óndirilip kelgen metaldyń bul túri quramy jaǵynan taza bolmaıtyn. 20 jyldyq zertteý jumystarynan keıin Sátpaev ýnıversıtetiniń ǵalymdary jańalyq ashty. Olar balqytylǵan mys qaldyqtarynan quramy taza selen alýdyń jolyn tapty.
«Bizdiń tehnologıa boıynsha 80 paıyzdyq las selennen bizdiń vakýmdyq peshimiz arqyly selendi ǵana ushyryp alyp, ony konvensırovat etip 99,5 prosentke deıin kóteremiz. Sóıtip selendi alamyz. Al qalǵan metaldar – altyny bar, kúmisi bar, ol tómen qaraı túsip ketedi», - deıdi Sátbaev ýnıversıteti Metalýrgıa jáne ken baıytý ınstıtýtynyń bas dırektory Baǵdáýlet Kenjeálıev.
Qazaqstan selenniń kelisin syrtqa 8 dollardan saýdalaıdy. Endi jańa tehnologıanyń arqasynda baǵasy 15 esege deıin ósýi múmkin. Óıtkeni quramy 99 paıyzǵa tazarǵan metalǵa suranys joǵary.
Jańalyq ashqan ǵalymdardyń aıtýynsha, bul jetistikke Memleket basshysy Qasym-Jomart Toqaevtyń qosqan úlesi zor. Óıtkeni, burynǵy Ǵylym jáne bilim mınıstrligi ekige bólinip, Ǵylym jáne joǵary bilim mınıstriligi qurylǵaly ǵylymǵa úlken kóńil bólinip, ǵalymdardyń jumysy jandanǵan. Tipti selen óndirýdiń tyń tehnologıasyn iri kompanıalar ózderinde qoldanyp, jańa sehtar ashyp jatyr.
«Biz uzaq ýaqyt mys qaldyqtary men sapasy tómen selendi qalaı paıdaǵa asyrarymyzdy bilmeı júrgenbiz. Jańa tehnolgıanyń arqasynda bul problema sheshildi. Bizdegi seh jylyna 75 tonnaǵa deıin ónim shyǵara alady. Tipti, ózge kásiporyndarda shyǵarylǵan sapasy tómen selendi qaıta óńdeýge qaýqarly», - deıdi Qazaqmys progres kompanıasynyń dırektory Aleksandr Shahalov.
Mamandardyń aıtýynsha, jańadan ashylǵan seh 100 adamdy jumyspen qamtýǵa múmkindik beredi. Aıta ketý kerek, buǵan deıin otandyq ǵalymdar 1 mln teńgeden astam jalaqy alyp kelse, endi jobalary men tehnologıalaryn kásiporyndarǵa engizý arqyly olardyń eńbekaqysy 6-7 mln teńgege deıin ósedi.