Ahmet Baıtursynuly atyndaǵy Til bilimi ınstıtýtynyń ǵalymdary qazaqsha saýatty jarnama jazýǵa kómektesýge daıyn.
Bul týraly Almatyda ótken «Qazaqstandaǵy ulttyq jarnama tilin qalyptastyrý jáne sıfrlandyrý» atty konferensıada aıtyldy, dep habarlaıdy Almaty-akshamy.kz.
24.kz habarlaýynsha, búginde ınstıtýt mamandary elimizde saýda-sattyqqa qatysty mátinderdi jınaqtap, elektrondy bazaǵa engizýde. Onymen «Qazaq tiliniń ulttyq korpýsy» saıtynan tanysýǵa bolady. Bul jarnama berýshige, PR-shylarmen, kopıraıterlerge qosymsha kómek quraly bolmaq. Kálka kúıindegi jarnamalardy azaıtyp, ulttyq naqyshtaǵy áserli ári saýatty aqparat berýge septigin tıgizedi.
«Bul qosymshany jarnama berýshiler paıdalana alady. Ol jerde jarnamaǵa qoldanylatyn modelder bolady. Jarnama tilinde kóp kezdesetin sózderdiń derekkózi bolady. Sonda jarnamalaýshy ózi jarnamasyn berer kezde arnaıy bir modelderdi, formýlalardy kóredi ol jerden», - deıdi A.Baıtursynuly atyndaǵy til bilimi ınstıtýtynyń bólim meńgerýshisi Aıman Jańabekova.