Seýlde banan óse bastady.
Biraq oǵan qýanyp jatqan fermerler joq. Óıtkeni bul klımat ózgerýiniń saldary bolýy múmkin deıdi. Iaǵnı Ońtústik Koreıanyń klımaty sýbtropıkalyq óńirlerge uqsaı bastaǵan. Al buǵan ǵalymdar alańdaýly, dep habarlaıdy aqshamnews.kz 24.kz-ke silteme jasap.
Banandar ádette tropıkalyq jáne sýbtropıkalyq óńirlerde ósedi. Al Ońtústik Koreıa qońyrjaı beldeýge jatady. Sondyqtan banan aǵashtarynyń jemis bere bastaýy fermerlerdi alańdatyp otyr.
Ma Món Son, fermer:
Biz 10 jyldaı banan ósireıin dep júrmiz. Biraq tek bıyl ǵana aǵashtardyń jemis bere bastaǵanyn kórip otyrmyz. Bul árıne qýantarlyq jaǵdaı. Alaıda ol klımattyń ózgerýiniń saldary ekenin oılasaq, kóńilimiz túsip ketedi.
2012 jyldan beri Ońtústik Koreıada ortasha jyldyq temperatýra kóterilip keledi. Byltyr kórsetkish 13,7 gradýsqa teń bolǵan. Bul - meteobaqylaý tarıhyndaǵy eń joǵary temperatýra. Odan bólek ótken jyly mýsondyq jańbyr maýsymy kezinde jaýyn-shashyn mólsheri ortasha jyldyq kórsetkishten eki ese asyp ketken. Osyǵan qarap mamandar Ońtústik Koreıanyń klımaty sýbtropıktik óńirdikine uqsap bara jatqanyn aıtady.
Kım Kvan Sý, Seýl ulttyq ýnıversıtetiniń profesory:
Seýlde banan ósirile bastaǵany Ońtústik Koreıa klımatynyń ózgerip jatqanyn bildiredi. Osyny eskere otyryp, biz endi túrli daqyldardyń jańa suryptaryn ósirýge beıimdelýimiz kerek.
Ońtústik Koreıada tropıkalyq jemister qymbat turady. Sondyqtan turǵyndar banandardyń pise bastaǵanyna qýanyp jatyr.
Kım Chjı Iýn, Seýl turǵyny:
Seýlde aǵashta ósip turǵan banandardy kórý bir túrli eken. Endi olar arzandasa jaqsy bolar edi.
Qazir Seýlde kún shyjyp tur. Túnde de aýa temperatýrasy 25 gradýstan tómen túspeıdi. Bul meteobaqylaý tarıhynda uzaqqa sozylǵan úshinshi ystyq tolqyny bolyp otyr. Al mamandar mundaı aýa raıy kemi bir aptaǵa jalǵasatynyn eskertedi.