Óz ómirin súıikti isine arnaǵan, kásibıligimen, eńbekqorlyǵymen qoǵamnyń damýyna úles qosyp júrgen jandar bar. Solardyń biri - Galına Norkına, dep habarlaıdy aqshamnews.kz
Galına Norkına – óz isin berile isteıtin, mamandyǵyn aıryqsha jaqsy kóretin jandardyń jarqyn úlgisi. Bala kezinen eńbektiń qadirin túsingen ol kún saıyn tózim men sheberlikti talap etetin kásippen aınalysqan jumysshy otbasynyń qundylyqtaryn boıyna sińirip ósedi.
«Men jumysshylar otbasynyń úshinshi býynymyn. Ata-anam meni árqashan óz jumysymdy jaqsy kórýdi jáne bir orynda turaqty eńbek ete bilýdi úıretti», - deıdi Galına Norkına.
Galına eńbek jolyn 1975 jyly 4 naýryzda, ıaǵnı 18 jasynda metal konstrýksıalary zaýytyna kelgen kezde bastapty. Ol alǵashqy jumysyna kran mashınısi kýrsyn támamdaǵan zerthanada kirisipti. Sodan soń satý bólimine ornalasyp, kóp uzamaı ózi kúni búginge deıin jumys istep kele jatqan armatýra sehyna aýysady.
«Tehnıkany jaqsy kórip turý qajet, – degen Galına ózine osy kásiptiń qyr-syryn úıretken tálimgerin esine aldy. – Ol árqashan «adamǵa istegen jumysy qýanysh syılaýy kerek» deıtin edi».
Bul sózder Galına úshin zaýytta ótken 50 jylǵy eńbek jolynda jón siltep turǵan Temirqazyqtaı boldy.
Kran mashınısiniń jumysy tek tehnıkalyq daǵdylardy ǵana emes, qaýipsizdik erejelerin qatań saqtaýdy da talap etedi.
«Eger qaýipsizdik sharalaryn saqtamasańyz, jumysyńyz nátıjesiz bolady», - deıdi Galına.
Onyń mindetine júk berý jáne shyǵarý, armatýra tıeý jáne túsirý, ónimderdi stanoktarǵa berip otyrý kiredi. Bul kásiptegi tabys kilti - usaq-túıekti nazardan tys qaldyrmaı, asa uqypty bolý.
Galınanyń aıtýynsha, kran mashınısi bolý úshin óz jumysyńdy jaqsy kórip, bıikten qoryqpaý jáne tyńǵylyqty bolý kerek.
«Maǵan óz jumysym qatty unaıdy, sondyqtan qashan ketetinimdi bilmeımin. Ózim eńbek etetin zaýytqa da ábden baýyr basyp qaldym», - deıdi ol óz tolqyp.
Galına Norkına kranshy ǵana emes. Ol jarty ǵasyr boıǵy bar kúsh-qýaty men bilimin bólisip, jas býyndy óz ónegesimen qanattandyryp kele jatyr. Onyń eńbek joly – qajetti ári suranysqa ıe mamandyqqa degen adaldyq pen súıispenshilik joly.
Eske sala ketsek, Memleket basshysy Qasym-Jomart Toqaev 2025 jyldy Jumysshy mamandyqtary jyly dep jarıalaǵan bolatyn. El Prezıdenti tehnıkalyq jáne kásiptik bilim berý júıesin reformalaýdy da tapsyrdy.
Aıta ketsek, Almaty TV telearnasynda «Made in Almaty», «Almaty kósheleri» «Ekonomıka jańalyǵy» jáne «Qala tynysy» sıaqty birqatar jańa baǵdarlama men jańalyqtar aıdary jaryq kórdi. Jýyrda «Almaty aýdandary» jáne «Keri baılanys» jobalaryn shyǵarý josparda bar.