Almatydaǵy Gagarın dańǵylyndaǵy ýchaskede jylý jelilerin qaıta qurý boıynsha qurylys-montaj jumystary aıaqtaldy. Munda asfáltbeton jabyny tóselip, kólik qozǵalysy qaıta ashyldy, dep habarlaıdy Almaty-akshamy.kz
«Almaty jylý jelileri» JSHS habarlaǵandaı, bıyl 29 maýsymynan bastap Bostandyq aýdanynda TM 1 jylý jelilerin Qojanov kóshesindegi TK 1-6-dan Ortalyq jylý taratý pýnktine deıin, Gagarın dańǵylynyń boıynda Qojanov kóshesinen Esqaraev kóshesine deıin qaıta jańartý jumystary júrgizilip jatyr.
Qazirgi ýaqytta Esqaraev kóshesinde qurylys-montaj jumystary júrgizilýde. Jylý jelileriniń bul ýchaskesi qoldanystaǵy qubyrdyń Qojanov kóshesi boıymen ótýine baılanysty jylý maýsymynyń daıyndyǵyna áser etpeıdi. Jumys bıyl qarasha aıynda aıaqtalady. Bıyl 548,7 m tóseldi, kelesi jylǵa taǵy da osynsha kólem josparlanǵan.
Júrgizilip jatqan qaıta qurýdyń maqsaty - TM 1 qalalyq jylý magıstraliniń fızıkalyq tozýyna baılanysty onyń jumysyn jaqsartý. Bul qalanyń joǵaryda atalǵan kósheleriniń aýmaǵynda ornalasqan 19 kóppáterli úıdiń, 2 balabaqshanyń jáne 39 basqa nysannyń turǵyndaryn jylýmen qamtamasyz etýge múmkindik beredi.
Esterińizge sala keteıik, bıylǵy jylýaralyq kezeńde Almatyda 17,7 km jylýmen jabdyqtaý jelileri, 120 km elektrmen jabdyqtaý, 43 km sýmen jabdyqtaý, 29 km gazben jabdyqtaý qaıta jańartylyp, jóndelip jatyr.