QR Premer-Mınıstriniń orynbasary – qarjy mınıstri Erulan Jamaýbaev G4 City jobasyn odan ári júzege asyrý máselesi boıynsha keńes ótkizdi.
G4 City jobasyn iske asyrý barysy týraly ulttyq ekonomıka vıse-mınıstri Baýyrjan Omarbekov baıandady. Onyń aıtýynsha, búginde G4 City jobasyn júzege asyrý boıynsha Qadamdyq jospardyń barlyq negizgi is-sharalary belgilengen merzimde atqarylýda.
«Qazirgi ýaqytta oblys ákimdigimen birlesip QR Prezıdentiniń «Almaty oblysynyń ákimshilik-aýmaqtyq qurylymynyń keıbir máseleleri týraly» Ókimin iske asyrý boıynsha Uıymdastyrý josparynyń jobasy ázirlendi», — dedi Baýyrjan Omarbekov.
Uıymdastyrýshylyq is-sharalar jospary aıasynda ekonomıkalyq esepterdi, jańa qalanyń sqemalyq kartasyn, memlekettik qurylymdy, shtattyq kestelerdi jáne basqa da is-sharalardy daıyndaý jumystary júrgiziledi.
Sonymen qatar qazirgi ýaqytta salyq shyǵyndaryn esepke ala otyryp, qarjylyq ekonomıkalyq model ázirlenip, merzimderdi anyqtap, jaýapty oryndaýshylardy belgileıtin Jol kartasynyń jobasy daıyndaldy. Oblys ákimdigi arnaıy ekonomıkalyq aımaq aýmaǵynyń shekarasyn keńeıtý týraly Úkimet qaýlysynyń jobasyn ázirleýde.
Baýyrjan Omarbekov halyqaralyq ınvestorlarǵa jobanyń naqty bastalýy týraly belgi bolatyn iri nysandardyń qurylysyn bastaý qajet ekenin atap ótti.
Keńes sońynda Erulan Jamaýbaev memlekettik organdarǵa QR Premer-Mınıstriniń tapsyrmalaryn oryndaý boıynsha keshendi sharalar qabyldaýdy, al Almaty oblysynyń ákimdigine memlekettik organdarmen birlesip G4 City jobasyn iske asyrýdy jedeldetýdi tapsyrdy.