Fınlándıa-Qazaqstan kezdesýi 2:6 esebimen jerlesterimizdiń jeńisimen aıaqtaldy
Qazaqstan qurama komandasy fýtzaldan Eýropa chempıonatyndaǵy ekinshi machynda jeńiske jetti, dep habarlaıdy Almaty-akshamy.kz
Alǵashqy týrda Qazaqstan quramasy sońǵy mınýttarda tarazy basyn teńestirip, Slovenıa quramasymen 4:4 oınaǵan bolatyn. Bir upaıdan keıin jankúıerler pleı-offqa shyǵýdyń qıyndap ketkenin jaqsy túsindi. Alaıda, sol machtan soń Italıa men Fınlándıa komandalary kezdesip, olar da jeńimpazdy anyqtaı almady. Sonyń saldarynan toptaǵy jaǵdaı birinshi týrdan soń birkelki boldy. Al ekinshi týrda Italıa men Slovenıa komandalary kezdesti. Bul oıynnyń esebi týrnırlik kestege qatty áser etetin. Favorıt Italıa quramasy bolǵanymen mach taǵy da teń aıaqtaldy. Osydan soń Italıa men Slovenıada 2 upaıdan boldy. Bul Qazaqstan men Fınlándıa úshin óte tamasha edi. Qaısysy jeńse týrnırlik kestede birinshi orynǵa shyǵatynyn alańǵa bilip shyqty.
Machtyń bastapqy bóliginde Fınlándıa quramasy shıraq qımyldady. Birinshi bolyp esepti de solar ashty. Biraq, Birjan Orazovtyń golynan keıin esep teńesti. Keıinnen Fınlándıa quramasy taǵy bir gol salyp, qorǵanystyń qateligin paıdalanyp ketti. Biraq qaqpashymyz Igıta ortaǵa shyǵyp, soqqy jasady. Esep 2:2 bolyp qaıta teńesti. Birjan Orazovtyń ǵalamat pasynan keıin Arnold Knaýb Qazaqstan quramasyn alǵa shyǵardy.
Birjan Orazov Azat Valıýlınniń pasynan keıin ádemi gol salyp, dúbl avtory atandy. Sosyn Arnold Knaýb Edsonnyń pasynan keıin esepti 5:2 qyldy. Al machtyń núktesin Azat Valıýllın qoıdy.
Qazaqstan quramasynda endi 4 upaı. 28 qańtar kúni saǵat 22.30-da Italıa quramasyna qarsy oınaıdy.
Fınlándıa – Qazaqstan – 2:6 (1:1)
Goldar: Hosıo 13 (1:0), Orazov 18 (1:1), Korpela 24 (2:1), Igıta 25 (2:2), Knaýb 29 (2:3), Orazov 32 (2:4), Knaýb 34 (2:5), Valıýllın 40 (2:6)
Eskertýler: Iý.Kútelá 19, Korpela 20 – Edson 20
Fınlándıa: Koıvýmákı, Savoláınen – Aýtıo (K), Iý.Kútelá, Hosıo, Allamıkkotervo, Pıkkaraınen, Iýrkıaınen, Iýnno, Korsýnov, Lıntýla, Korpela, Peılıe, Vanha.
Qazaqstan: Igıta (K), Atantaev – Taınan, Tursaǵulov, Dýglas, Orazov, Qaraǵulov, Edson, Valıýllın, Knaýb, Toqaev, Saǵyndyqov.