Almatylyqtarǵa fýtgolf degen ne jáne ol nelikten bolashaqtyń sporty ekeni aıtyldy
Bul erekshe sport túri búkil álemde tanymaldylyqqa ıe bolýda. Bul týraly Óńirlik komýnıkasıalar qyzmetiniń baspasóz-konferensıasynda Halyqaralyq fýtgolf federasıasy men Qazaqstan fýtgolf federasıasynyń ókilderi habarlady.
Fýtgolf - gólf pen fýtbol qospasy: sportshylar barynsha az soqqymen belgili bir shuńqyrlar sany bar alańnan ótýi kerek, biraq gólf dobynyń ornyna olar kádimgi fýtbol dobymen oınaıdy.
Halyqaralyq fýtgolf federasıasynyń prezıdenti Aleksandr Kravaná Qazaqstannyń osy sport túrin damytý úshin aıtarlyqtaı áleýeti bar ekenin atap ótti.
«Biz jergilikti federasıaǵa jınalǵan komandany eskere otyryp, Qazaqstanda fýtgolfty damytýdyń úlken áleýetin kórip otyrmyz. Biz Qazaqstanda adamdar osy sport túrimen aınalysýy úshin, fýtgolftyń barlyǵyna qoljetimdi bolǵanyn qalaımyz. Qazaqstandyq fýtgolf federasıasy sportty el ishinde keńinen nasıhattap, ony damytyp, adamdarǵa jetkize alatynyna senimdimin», - dedi ol.
Onyń pikirinshe, fýtgolftyń damýy is-sharalardy uıymdastyrýǵa, jattyqtyrýshylyq qyzmetke jáne alańdarǵa qyzmet kórsetýge baılanysty jańa jumys oryndarynyń ashylýyna ákelýi múmkin. Ol sondaı-aq sporttyq jabdyqtar men qyzmetter salasyndaǵy shaǵyn jáne orta bıznesti yntalandyrýy múmkin.
Qazaqstan fýtgolf federasıasynyń prezıdenti Erbol Buharbaev oıynnyń tanymaldylyǵynyń artyp kele jatqanyn túsindirdi. Ol fýtgolftyń belsendi jáne saý qoǵam qurýǵa yqpal etýi múmkin ekenin atap ótti.
«Qazaqstandyq fýtgolf Federasıasy 2019 jyly quryldy, al halyqaralyq fýtgolf federasıasy 2012 jyldan beri jumys isteıdi. Bul óte qarqyndy jáne tez damyp kele jatqan sport túri. Sondaı-aq, ol ekonomıkalyq jaǵynan da, ekologıalyq jaǵynan da tıimdi, óıtkeni ol úlken ınvestısıalar men shyǵyndardy qajet etpeıdi jáne resýrstardy az qajet etedi, bul ony ekologıalyq turaqty sport túrine aınaldyrady. Fýtgolf oınaý barysynda birlesken kúsh pen komandalyq jumys qajet etiledi, ol balalardyń salaýatty ómir saltyn qalyptastyrýǵa jáne otbasyn biriktirýge oń áserin tıgizetini anyq», - dedi ol.
Sondaı-aq, týrısik tartymdylyq turǵysynan fýtgolfty týrısik nysandar men kýrorttarǵa biriktirý belsendi demalys túrlerin izdeıtin qosymsha týrıserdi tarta alatyndyǵy atap ótildi. Bul sonymen qatar sporttyq týrızmniń damýyna yqpal etedi.
«Barlyq týrısik oryndarǵa fýtgolfty engizý olardyń tartymdylyǵyn aıtarlyqtaı arttyryp, usynylǵan áreketterdi ártaraptandyrýy múmkin. Týrıser fýtbol men gólftyń erekshe úılesimin tamashalaı alady, bul sport áýesqoılary úshin de, balalary bar otbasylar úshin de qyzyqty tájirıbe bolady. Mundaı bastama sonymen qatar kelýshilerdi kóbirek tartýǵa jáne el óńirlerinde sporttyq oıyn - saýyq ınfraqurylymyn damytýǵa yqpal etýi múmkin», - dep naqtylady ol.
Qazaqstanda fýtgolf belsendi damyp keledi. Festıváldar men áýesqoı týrnırler josparlanǵan. Osy jyldyń qazan aıynda fýtgolftan «Altyn Orda Kýbogy» halyqaralyq chempıonatyn ótkizý josparlanýda.
Erlan Isaev Halyqaralyq Chempıonattyń sporttyq jarystardyń álemdik kúntizbesinde mańyzdy oqıǵa bolýynyń barlyq alǵysharttary bar ekenin atap ótti. Onyń damýy men ilgerileýi fýtgolftyń tanymaldylyǵynyń artýyna jáne álemdik sport qaýymdastyǵyndaǵy osy qyzyqty sporttyń pozısıalarynyń nyǵaıýyna yqpal etýi múmkin.
Brıfıńke qatysqan Qazaqstan fýtgolf federasıasynyń vıse-prezıdenti Ádil Erdesov atalǵan sport túrin elimizde keńinen nasıhattaýǵa shaqyrdy.
«Ókinishke oraı, búgingi tańda bul sport túri Batys elderi men Eýropadaǵydaı Qazaqstanda tanymal emes. Sondyqtan biz respýblıkada osy sport túrin damytý arqyly jastardy belsendi túrde tartý týraly sheshim qabyldadyq. 18-19 qazanda postkeńestik elder, sondaı-aq Eýropa, Amerıka qatysatyn «Altyn orda» úlken kýbogy ótedi dep aıtqymyz keledi. Biz osy baǵytta damıtyn bolamyz. Barlyǵyn yntymaqtastyqqa jáne jumysqa shaqyramyz. Osyndaı prosester arqyly biz osy sport túrin tanymal etkimiz keledi. Jańa sport túri retinde onyń deńgeıin kótermekpiz», - dep atap ótti ol.
Qorytyndylaı kele, spıkerler fýtgolf ártúrli fızıkalyq daıyndyq deńgeıleri bar adamdarǵa, sonyń ishinde balalarǵa, qart adamdarǵa jáne dástúrli sport túrlerimen salystyrǵanda az qarqyndy fızıkalyq belsendilikti unatatyndarǵa jaramdy ekenin aıtty. Sporttyń ınklúzıvtiligi onyń ártúrli áleýmettik toptarda jáne jas sanattarynda taralýyna yqpal etedi.