17-19 naýryz kúnderi mogýl jáne shańǵy akrobatıkasy boıynsha álem kýboginiń fınaldyq kezeńi «Shymbulaq» taý-shańǵy kýrortynda ótedi.
Almatydaǵy álem kýbogy kezeńine daıyndyq jumystarynyń qalaı ótip jatqanyn «Shymbulaq» taý shańǵysy kýrortynyń komersıalyq dırektory Vladıslav Semenov túsindirdi, dep habarlaıdy Almaty-akshamy.kz QazAqparatqa silteme jasap.
«Fınal Almatyda ótedi. Myqtylardyń bári osynda bas qosady. Medaldar oınatylyp, altyn globýs tabystalady. Bizdiń komandanyń frıstaıldan óte myqty ekenin bilesizder, sportshylarymyz júldeli oryndarǵa ıe bolady dep úmittenemiz»,- deıdi ol.
«Shymbulaq» taý shańǵysy kýrortynyń dırektory Rınat Ábdirahmanovtyń sózinshe, mogýl jarysy jańa trassada ótedi.
«Osy jazda biz kóp jumys atqardyq. Úsh shaqyrymnan astam jolǵa jasandy qar júıesin qosyp, joldy uzarttyq. Jeltoqsan aıynda biz «Sýhoı Log» trassasyn iske qosýdy josparlap otyrmyz, onda osy maýsymda paraleldi jáne jeke mogýl boıynsha álem kýbogynyń fınaldyq kezeńi ótedi, bul bizge ulttyq qurama úshin Artemenko trassasyn ashýǵa múmkindik beredi. Qazir biz ártúrli elderdiń quramalarymen altydan astam kezdesý ótkizdik, olar 11 jeltoqsannan bastap bizde, oqý-jattyǵý jıyndaryn ótkize bastaıdy», - dedi ol.
Aıtýynsha, trassany jarysqa daıyndaý qańtar aıynda bastalady.
«Qazirgi ýaqytta 2023 jyldyń jeltoqsanynda shańǵy akrobatıkasynan álem kýbogynyń birinshi kezeńin ótkizýge qatysty FIS-pen kelissózder júrgizilip jatyr»,- dedi Rınat Ábdirahmanov.
Eske salaıyq, byltyr Qazaqstanda tuńǵysh ret frıstaıldan álem chempıonaty ótti, onyń qorytyndysy boıynsha bizdiń sportshylar úsh medal jeńip aldy.