«Baqsy sıqyry» shyǵarmasy óner súıer qaýymdy tánti etti
«Astana keshteri» HI halyqaralyq óner festıvaliniń alǵashqy konsertinde erekshe mýzykalyq týyndynyń premerasy ótti.
Fransýz kompozıtory Per Tılýa jazǵan qobyz ben skrıpkaǵa arnalǵan «Baqsy sıqyry» atty jańa mýzykalyq shyǵarmasy barsha óner súıer qaýymdy tánti etti, dep habarlaıdy Almaty-akshamy.kz Baq.kz-ke silteme jasap.
Eki ishekti aspap – qylqobyz ben skrıpkanyń qaıtalanbas dýetin tyńdarmandar joǵary baǵalady. Álemdik premerany Fransıadan kelgen qobyzshy Aıgerım Ersaınova-SHýster men skrıpkashy Kventın Fogel oryndady.
Sondaı-aq bul keshte belgili qazaqstandyq jáne sheteldik óner juldyzdary fransýz kompozıtorynyń fortepıanolyq jáne ansámbldik týyndylaryn shyrqady. Belgili pıanıs, Qazaqstannyń eńbek sińirgen qaıratkeri Tımýr Ýrmancheev, ált aspabynda oınaǵan Anna Serova (Italıa), skrıpkashy Sholpan Mankeeva, vıolonchelıs Murat Narbekov pen pıanıs Dına Mırmanovanyń sheberligi zor yqylasqa bólendi. Mýzykanttar Per Tılýa shyǵarmalarynyń áýeni men kórkemdik alýan túrliligi erekshe ekendigin atap ótti
Per Tılýa – 8 úlken sımfonıanyń, 20 sımfonıalyq poemanyń, 3 orkestr, 3 hor jáne 7 solıs úshin jazylǵan oratorıanyń avtory. Kóptegen ulttyq jáne halyqaralyq syılyqtardyń ıegeri bolyp tabylady. Kompozıtor álemdi aralap, Ortalyq Azıa men Ortalyq Shyǵys elderine jıi saıahattaǵan. Birneshe jyl Ázerbaıjan men Ózbekstanda ómir súrip, osy elderdiń mádenıetin tereń zerttegeni kompozıtordyń mýzykasynda da aıqyn kórinis tapqan. Qazirgi kezde Tılýany álem mýzykanty dep ataıdy. Fransýz avtory qazaq mýzykasy negizinde ulttyq aspaptarda oryndalatyn kóptegen kompozısıalardy jazdy.
Avtordyń aıtýynsha, qobyzdyń úni oǵan erekshe áser etti.
«Qobyzdyń úni meni birden baýrap aldy. Onyń qaıtalanbas áýenderi «Baqsy sıqyry» atty qobyz ben skrıpkaǵa arnalǵan shyǵarmanyń jazylýyna shabyt berdi. Bul – meniń Qazaqstan eline degen qurmetimdi bildiretin arnaıy tartýym. Qazaqstanǵa alǵash ret kelip, osy keremet eldiń astanasynda shyǵarmashylyq keshimdi ótkizý – men úshin úlken mártebe», - dep jetkizdi Per Tılýa.
Ol festıváldiń uıymdastyrýshysy – «Degdar» gýmanıtarlyq qoryna óz alǵysyn bildirdi. Fransýz kompozıtorynyń mýzykasy ónerde shekara bolmaıtynyn taǵy bir dáleldeı tústi. Bul týraly óz pikirin «Degdar» qorynyń dırektory Laýra Ahmetova jetkizdi.
Per Tılýanyń shyǵarmashylyǵy kóp qyrly. Onyń Fransıa tórinde týǵan áýenderinde Azıa úni estiledi. Kompozıtor qazaq mýzykasyn óte jaqyn qabyldady. Jalpy, jyl saıyn festıvál aıasynda san túrli memlekettiń mýzykalyq ónerin ózara jaqyndastyratyn erekshe konsertter ótedi. Demek, mýzyka óneri aınalamyzdy jarqyn etip, birligimizdi arttyra túsetin alyp kúshke ıe, - dedi Laýra Ahmetova.
«Astana keshteri» óner festıvaliniń taǵy 3 konserti «Astana balet» teatrynda ótedi jáne kórermender olardy tegin tamashalaı alady.