Depýtattardan taǵy bir tyıym: konsertterde fonogram qosýǵa tyıym salynýy kerek, sebebi tyńdarman jandy daýysqa aqsha tóleıdi dedi depýtat Maqsat Tolyqbaı, dep habarlaıdy aqshamnews.kz
Májilis depýtaty Maqsat Tolyqbaı kórermen nege bılet satyp alyp, «fanera» tyńdaýy kerek dep ashyndy.
«Zań boıynsha konsertterde fonogramny jasyryn qoldanýǵa tyıym salynǵan. Iaǵnı, is-sharany uıymdastyrýshylar bul týraly kórermenderge habarlaýǵa mindetti, biraq eshkim muny oryndamaıdy», – dedi ol.
Depýtattar zań jobasyna fonogram qoldanýǵa qatysty birneshe túzetý engizgenimen, olar qabyldanbady.
«Kóptegen syltaýlar aıtyldy – óńirlerdegi tehnıkanyń 70%-y eski, bilikti dybys rejıserleri jetispeıdi, taǵy basqa. Aqyrynda, biz bylaı usyndyq: eger konsert ótetin oryn (stadıon nemese úlken alań) is-sharaǵa beıimdelmegen bolsa, fonogramny qoldanýǵa ruqsat berý kerek. Eń bastysy – kórermender aldyn ala habardar bolýy tıis», – dep túsindirdi depýtat.
Mádenıet jáne aqparat vıse-mınıstri Aıbek Sydykov mınıstrlik bul másele boıynsha mamandardyń pikirin eskeretinin aıtty.
«Biz barlyq múddeli taraptardy jınap, ashyq talqylaý ótkizýge kelistik. 11 naýryzda bul máseleni shoý-bıznes ókilderimen, mádenıet mekemeleriniń basshylarymen jáne rejıserlermen birge qarastyramyz», – dep ýáde berdi vıse-mınıstr.