Materıaldyq shyǵyn 20 mıllıon teńgeni qurady.
Almaty polıseıleri jalǵan qujattar arqyly fırmalardan iri kólemdegi aqshany jymqyryp keldi degen kúdikpen er azamatty ustady, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy derek boıynsha, jedel izdestirý is-sharalary barysynda polısıa qyzmetkerleri 30 jastaǵy S.esimdi azamatty ustady. Ol birqatar alaıaqtyq áreketter jasady degen kúdikke ilindi. Qazirgi ýaqytta úsh qylmystyq is bir óndiriske biriktirilip, QR QK-niń 190-baby 2-bóligi, 4-tarmaǵy boıynsha tergelýde.
«S.esimdi azamat qaladaǵy ártúrli fırmalardyń qoımalaryna “jetkizýshi” bolyp jumysqa ornalasty. Biraz ýaqyttan soń, fırma qyzmetkerleriniń senimine kirip alǵannan keıin, qoımadan taýarlardy shyǵarý úshin qujattardy qoldan jasady. Taýardy alǵannan keıin ol belgisiz baǵytta jasyrynyp, sodan keıin ınternet alańdar arqyly qylmystyq jolmen alynǵandy naryqtyq baǵadan tómen baǵamen satty. Jalpy materıaldyq shyǵyn 20 mıllıon teńgeni qurady», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Jigittiń bul aldaý tizbegin ózi oılap tapqany jáne jalǵyz áreket etkeni anyqtaldy. Qazirgi ýaqytta kúdikti ýaqytsha ustaý ızolátorynda. Tergeý sharalary júrgizilýde.
