Fınlándıada 27 mamyrda alǵash ret maımyl sheshegi tirkeldi, dep habarlaıdy Almaty-akshamy.kz Almaty.tv-ge silteme jasap.
Infeksıa Eýropada júrgen er adamnan tabyldy. Naýqas qazir jazylyp keledi. Aýrýǵa kúdik baryn 25 mamyrda habarlaǵan.
Maımyl sheshegi - adamdarǵa janýarlardan beriletin, 1970 jyldary Kongo Demokratıalyq Respýblıkasynda tirkelgen sırek kezdesetin vırýstyq zoonozdy aýrý. Sımptomdaryna bas aýrýy jáne teri bórtpeleri jatady. Bórtpe betten bastalyp, deneniń qalǵan bóligine taraıdy.
Eske salaıyq, buǵan deıin DDSU maımyl sheshegi aýrýyn talqylaý úshin sarapshylardyń tótenshe jınalysyn shaqyrǵan bolatyn. Sonymen qatar uıym ókili Afrıkadan tys jerlerde maımyl sheshek vırýsyna qarsy jappaı vaksına alýdyń qajeti joq dep sanaıtynyn jetkizgen edi.
DDSU málimetinshe, álemde aýrýdyń 200-ge jýyq rastalǵan jaǵdaıy tirkelgen, biraq is júzinde olardyń sany edáýir kóp bolýy múmkin.