Býrabaıda ótip jatqan Ulttyq quryltaıda Memleket basshysy Qasym-Jomart Toqaev elimizde sońǵy ýaqytta jıilep bara jatqan alaıaqtyq áreketterine alańdaýshylyq bildirip, bul máselege qatysty pikirin bildirdi.
«Quryltaı músheleri taǵy bir jaıtqa alańdaýshylyq bildirip otyr. Sońǵy kezde el ishinde túrli alaıaqtyq áreketter jıilep barady. Teris pıǵyldy adamdar qaıyrymdylyqqa dep aqsha jınap, ony jeke basynyń paıdasyna jaratady. Sondaı-aq kóp adam ınternet-alaıaqtardan zardap shegýde», – dep aıtty Prezıdent.
Qasym-Jomart Toqaev alaıaqtyqtyń jańa túri retinde qazirgi ýaqytta kóbeıip ketken jalǵan psıhologtar men «koýchtardy» da atap ótti.
«Qazir jurtqa aqyl aıtyp aqsha tabatyn jalǵan psıhologtar men «koýchtar» kóbeıip ketti. Olarǵa senip, aldanyp qalǵandar kóp. Maǵan bul týraly kóptegen shaǵym túsip jatyr», – dedi Memleket basshysy.
Prezıdent osy máselege qatysty Quryltaı múshesi Aıgúl Orynbektiń kótergen máselesi oryndy ekenin aıtyp, jaýapty organdardy bul máselege nazar aýdarýǵa shaqyrdy.