Almaty ákimdigi femınıst belsendilerdiń 8 naýryz kúni beıbit mıtıń ótkizý týraly ótinishine taǵy da tyıym saldy. Resmı jaýapta mundaı is-sharanyń «qoǵamdyq tártipke qaýip tóndirýi múmkin» ekeni kórsetilgen, dep habarlaıdy aqshamnews.kz
Belsendiler bul týraly ózderiniń Instagram paraqshasynda habarlady:
«Biz 13 qańtar kúni ákimdikke 8 naýryzda mıtıń ótkizý týraly habarlama men marshqa arnalǵan ótinish jiberdik. Alaıda 15 qańtarda mıtıńke ruqsat berilmegeni týraly jaýap aldyq. Sebep retinde "qoǵamdyq tártiptiń buzylý qaýpi“ kórsetilgen. Biraq biz bul sheshimmen kelispeımiz jáne ony sot arqyly qaıta qaraýǵa nıettimiz. Al marshqa qatysty jaýap ázirge túsken joq».
Belsendiler ákimdiktiń bul sheshimin qabyldamaý sebebin túsindirip, ony zańdy túrde qaıta qaraýdy talap etpek. Olardyń aıtýynsha, bul tyıym bılik tarapynan 15-shi ret jasalyp otyr.