Pandemıa týraly taǵy bir jalǵan aqparat tarady
Qazaqstandyqtar áleýmettik jelilerde «pandemıa tek 2025 jyly aıaqtalady» dep jazylǵan Halyqaralyq qaıta qurý jáne damý banki men Halyqaralyq damý qaýymdastyǵy qujatynyń skrınshotyn taratyp jatyr, dep habarlaıdy Almaty-akshamy.kz
Jeli qoldanýshylary aıtyp otyrǵan qujat bar jáne barshaǵa qoljetimdi. Onda COVID-19 pandemıasynyń qashan aıaqtalatyny týraly boljam jasalmaǵan. İs júzinde qujatta «osy jahandyq pandemıamen jáne onyń saldarymen kúreste HDQ jáne HQDB baǵdarlamasyna qatysýǵa quqyǵy bar elderge» kómek pen qoldaý kórsetý tetikteri sıpattalǵan.
Bul tizimge Aýǵanstan, Argentına, Kabo-Verde, Kambodja, Kongo Demokratıalyq Respýblıkasy, Djıbýtı, Ekvador, Efıopıa, Gambıa, Gana, Gaıtı, Úndistan, Kenıa, Qyrǵyz Respýblıkasy, Maldıv, Mavrıtanıa, Mońǵolıa, Pákistan, Paragvaı, San-Tome jáne Prınsıpı, Senegal, Serra-Leone, Shrı-Lanka, Tájikstan jáne Iemen kirgen. Iaǵnı, qujat pandemıany josparlaýǵa emes, muqtaj elderge kómek taratýǵa arnalǵan. Bul baǵdarlama 2020 jyldyń 2 sáýirinen 2025 jyldyń 31 naýryzyna deıingi kezeńge arnalǵan.
Iaǵnı, osy kezeńde bank COVID-19 pandemıasy kezinde qoldaýdy qajet etetin elderge barynsha kómek kórsetedi. Halyqaralyq qaıta qurý jáne damý bankiniń pandemıa jarıalaýǵa nemese ony uzartýǵa quqyǵy joq. Sonymen qatar, pandemıanyń aıaqtalýy belgili bir organdardyń málimdemesine emes, búkil álemdegi COVID-19 aýrýshańdyq deńgeıine baılanysty. Demek, jelide tabylǵan qujat Halyqaralyq qaıta qurý jáne damý bankiniń qyzmetkerleri qandaı da bir qupıa aqparatty biletinin emes, banktiń muqtaj elderge kómek kórsetetinin ǵana dáleldeıdi.