Meımandardyń kóbi «Altyn adam» ekspozısıasyna kóp aıaldaıdy
EXPO – 2020 Dubai dúnıejúzilik kórmesi bastalǵan bir aıdyń ishinde Qazaqstannyń ulttyq pavılonyn 207 myń adam tamashalapty. «Aqyl-oıdy ushtastyrý – bolashaqty qalyptastyrý» degen taqyryppen ótip jatqan jıynǵa álemniń 190-nan astam memleketi qatysyp jatyr, dep habarlaıdy Almaty-akshamy.kz
EXPO kórmesi úsh aýmaqqa bólingen. «Múmkindikter» dep atalatyn klasterde Qazaqstannyń pavılony ornalasqan. Ulttyq pavılonmen qońsylas Birikken Arab Ámirlikteriniń, AQSH, Japonıa, Qytaı men Italıa sekildi biraz eldiń ǵımarattary jaıǵasqan.
Ulttyq pavılonnyń ishi zamanaýı tehnologıalarmen tolyq jabdyqtalǵan. «Vision Machine» ınstallásıasynda agroónerkásip, qorshaǵan ortany qorǵaý, aeroǵarysh ónerkásibi sekildi salalardaǵy Qazaqstannyń áleýeti kórsetiledi. Budan bólek, bul jerde Uly dalanyń baı tarıhymen, mádenıetimen, dástúrimen bir mezette tanysýǵa bolady. Meımandardyń kóbi «Altyn adam» ekspozısıasyna kóp aıaldaıdy. Qazaqstannyń tabıǵı resýrstary da kópshilik úshin qyzyq. Sırek kezdesetin mıneraldardyń úlgileri osynda qoıylǵan.
«Biz Qazaqstannyń tarıhyn, mádenıetin, jer baılyǵy jáne tabıǵaty jóninde aqparat beremiz. Budan basqa Qazaqstanda shyqqan QazVac vaksınasyn da kórsetip jatyrmyz», - dedi Qazaqstan pavılonynyń qyzmetkeri Bıbigúl Jumaǵulova.
Adam men jasandy ıntelektiń úılesimdiligi – muny Qazaqstan pavılonyndaǵy tutas baǵdarlamanyń ózegi desek bolady. Meımandardyń kóbi osy shoýdy tamashalaý úshin keledi.
Birikken Arab Ámirlikteri 7 mlrd dollardan astam qarajat jumsap uıymdastyrǵan kórmeni 25 mlnǵa jýyq adam tamashalaıdy degen boljam bar. Al Qazaqstan pavılonyn bir kúnniń ishinde 7-8 myń adam aralap shyǵady. Demalys kúnderi munda kelýshilerdiń sany budan da kóp. Aldaǵy ýaqytta Qazaqstan pavılonynda birneshe is-shara uıymdastyrylady. Eldiń Ulttyq kúni ótedi, Táýelsizdik kúnine, Naýryz meıramyna oraılastyrylyp konsertter qoıylady.