Almaty qurylys-tehnıkalyq kolejiniń bazasynda EuroSkills Herning 2025 halyqaralyq chempıonatyna WorldSkills quzyretteri boıynsha Qazaqstannyń Ulttyq quramasyna arnalǵan psıhologıalyq daıyndyq jumystary ótkizilip jatyr, dep habarlaıdy Aqshamnews.kz tilshisi.
İs-sharaǵa Ulttyq quramanyń 50 ókili qatysyp, bir bóligi Eýropanyń eń bedeldi kásibı chempıonattarynyń biri – EuroSkills Herning 2025 baıqaýynda el namysyn qorǵaıtyn bolady.
Psıhologıalyq daıyndyqty jýyrda IýNESKO klýbtarynyń Ulttyq Federasıasynyń resmı klýby mártebesin alǵan «Jańa Urpaq» bilim berý qozǵalysy uıymdastyrýda. Joba 10 jyl ishinde Qazaqstan men ózge elderdiń 17 000-nan astam jasyn qamtyp, olardyń kóshbasshylyq, kommýnıkatıvtik jáne komandalyq daǵdylaryn damytýǵa úles qosty.
«Baǵdarlamanyń maqsaty – qatysýshylardyń tózimdiligin arttyrý, ózin-ózi retteý, komandalyq ózara árekettesý jáne halyqaralyq jarystarda senimdilik daǵdylaryn damytý. Shara aıasynda sertıfıkattalǵan jattyqtyrýshylar men psıhologtardyń qatysýymen sheberlik sabaqtary, toptyq trenıńter jáne jeke sesıalar ótkiziledi. Bul psıhologıalyq daıyndyq arqyly qatysýshylardyń bir-birimen baılanysy nyǵaıa túspek», – dedi «Talap» UAO Worldskills qozǵalysyn damytý bóliminiń basshysy Laýra Bolatbekqyzy.
Aıta keteıik, 2025 jyl Qazaqstanda «Jumysshy mamandyqtar jyly» dep jarıalanǵan edi. Demek, atalmysh daıyndyqtyń da maqsaty – jastar arasyndaǵy jumysshy mamandyqtardyń bedelin arttyrý jáne olardy keńinen nasıhattaý. EuroSkills – Eýropadaǵy eń iri jumysshy kásipter chempıonaty. Ol eki jylda bir ret ótkizilip, 25 jasqa deıingi jas mamandardy biriktiredi. Jarys ónerkásiptik óndiristen bastap qyzmet kórsetý salasyna deıin 40-tan astam quzyrettilikti qamtıdy. Bıyl 30-dan astam eldiń qatysýshylarynyń basyn biriktiretin chempıonat Danıanyń Hernıng qalasynda ótedi.
"Baǵdarym – qonaq úı sharýashylyǵy quzyrettiligi. Qyrkúıek aıynda bolatyn chempıonatqa daıyndyǵymyz keremet. Shyny kerek, basynda nemquraıly qaradym. Jattyqtyrýshymmen tanys bolǵanymmen, daıyndyqtyń joǵary deńgeıde bolatynyna bastapqyda senbep edim. Máselen, bizde jaqynda ǵana 6 saǵattyq tájirıbe boldy, biraq ony 4 saǵatta bitirdik. Sport zaldyń ortasynan eki jip tartylyp, bárimiz jiptiń bergi jaǵynda turdyq. Basty shart – 50 adamnyń sol jipke tımeı, ortasynan ótýi. Aldaǵy týrnırdiń maqsaty jumysshy mamandyqtardyń mańyzdylyǵyn kórsetý dep sanaımyn. Bul – meniń halyqaralyq arenadaǵy ekinshi jarysym. 2024 jyly Fransıada ótken jarysta óner kórsetken edim" deıdi qatysýshy Janel Saǵyndyq.