Qytaılyq áıel 13 jyldan beri dúkeniniń jaryǵyn sóndirmeı keledi. Ol bul áreketin áıelderdiń qaýipsizdigin oılaǵany úshin jasaǵan, - dep habarlaıdy Aqshamnews.kz tilshisi SCMP-ke silteme jasap.
Qytaıdyń ortalyǵyndaǵy Hýnan provınsıasy, Chansha qalasynyń 60 jastaǵy turǵyny Sýn Meıhýa 13 jyldan beri túnde dúkeniniń jaryǵyn sóndirmegen. Ol bul áreketti 2012 jyly dúken ashqan sátten bastap ádetke aınaldyrǵan.
Sýnnyń aıtýynsha, birde birneshe jas qyz oǵan kelip, dúken mańyndaǵy jaryqtyń úıge jumystan qaıtyp bara jatqanda qaýipsiz sezinýge kómektesetinin aıtqan. Sol sátten bastap ol syrtqy jaryqty birde-bir ret sóndirmegen.
Jaryqpen birge jumys ýaqyty da uzartylǵan. Qazir dúken túngi ekige deıin ashyq. Keıde keshki ýaqytta jalǵyz júrýge qorqatyn qyzdardy Sýn úıine deıin de shyǵaryp salady.
Turǵyndar ony "jaryq táte" dep atap ketken. Bul - onyń aınalasyndaǵylarǵa degen meıirimi men qamqorlyǵyna baılanysty qoıylǵan laqap.
Sýn tipti úıindegi stasıonarlyq telefondy dúkenge kóshirip qoıǵan. Onymen qart kisiler men balalar tegin habarlasa alady, sebebi keıbiri uıaly telefon ustamaıdy nemese paıdalana almaıdy. Jyl saıyn tozǵan telefonyn Sýn jańalap otyrady.
"Qyzmetti toqtatý týraly eshqashan oılaǵan emespin. Men tek kómekteskim keledi", – deıdi ol.
Buǵan qosa, qala turǵyndary oǵan úı kiltteriniń qosalqy kóshirmesin senip tapsyrady. Sýn olardy muqıat saqtaıdy jáne qajet bolǵanda kómekke keledi.
"Kómek kerek bolsa, men birden Meıhýaǵa baramyn. Men oǵan senemin", – deıdi kórshi ájeı.
Sýn men onyń kúıeýi bul aýdanda 20 jyldan asa ýaqyttan beri turady. Buryn olar memleketten járdemaqy alyp kelgen. Áıeldiń aıtýynsha, ol kezde jergilikti qaýymdastyqtan kóp kómek alǵan. Qazir ol osy qamqorlyqtyń óteýin qaıtarǵysy keledi.
Sýn Meıhýanyń bul oqıǵasy jelide keń taralyp, jurttyń júregin eljiretti. Áleýmettik jeli qoldanýshylary onyń tabandylyǵyn jáne kómektesýge degen shynaıy nıetin erekshe atap ótken.