Belgıalyq stýdent Steın Romboýt 5 jyldan beri qazaqshany ǵalamtordan úırenip júr, dep habarlaıdy Almaty -akshamy. kz.
2018-diń jazynda elge alǵash saparlap, Almaty, Shymkent pen Túrkistandy asyqpaı aralaǵan. Uly dala eline, qazaq tiline degen mahabbat sol saparda oıandy, deıdi ózi.
«Qazaqstan óte qyzyqty el. Men Qazaqstandy jaqsy kóremin. Bes jyl buryn Qazaqstanǵa týrıs retinde bardym. Maǵan qazaq tabıǵaty qatty unady. Qazaqtar da óte qonaqjaı», - deıdi «Ku leuven» ýnıversıtetiniń stýdenti Steın Romboýt.
Qazaqtyń mádenıeti men tarıhyna tereń boılaǵysy keletin Steınniń qazaqsha aty-Syrym. Syrym Datuly sıaqty batyr, batyl bolsam dep osy esimdi tańdaǵanyn aıtady. Ǵalamtordan qazaq tilin úırengeli Abaıdyń shyǵarmalaryn qazaqsha oqýǵa tyrysyp júr.
«Men túrikshe bilemin, sondyqtan qazaq tilin úırený onsha qıyn emes. Biraq, áli de gramatıka qıyn bolýy múmkin. Oqýlyǵym bar. Kúnine elý sóz qaıtalaımyn. Maǵan «mássaǵan» degen sóz unaıdy», - deıdi Steın.
Túrik, fransýz, nıderland, aǵylshyn, qytaı, alban tilderin biletin Syrymnyń endigi armany-qazaq tilin jetik meńgerý. Maqsatyna qol jetkizý úshin qazir Belgıadaǵy qazaq jastarymen dostasyp, qazaqsha sóılesip júr. Bolashaqta Qazaqstanda turyp, biraz jyl til mamany retinde jumys istegisi keledi.