Qurǵaqshylyqtan kóbine Eýropa Odaǵynyń ońtústiktegi elderi – Ispanıa, Portýgalıa men Fransıa zardap shegip otyr, al Italıada oǵan qosa sý tasqyny bolyp jatyr. Topyraqtaǵy ylǵal Baltyq pen Skandınavıada da azaıyp ketti, dep habarlaıdy Almaty-akshamy.kz Euronews agenttigine silteme jasap.
Ońtústik Eýropa kúnniń ysýyna jáne qýańshylyqtyń kúsheıetinine daıyndalyp jatyr. Ol elderdiń aýyl sharýashylyǵyna keri áserin tıgizedi. Eń kóp zardap shekken Eýroodaqqa múshe elder ózderine qarjylaı kómek kórsetýdi, naqtyraq aıtqanda qıyn kezeńde fermerlerge kómek kórsetýge arnalǵan «Agrarlyq rezervten» 450 mıllıon evro kóleminde qarjy bólýdi surap jatyr.
«Bıyl biz Ispanıada gıdrologıa jyly bastalǵaly jaýyn-shashyn mólsheri 30%-ten astam azaıǵanyn baıqadyq. Bul jaıylym jerlerdegi maldardy jem-shóppen qamtamasyz etýge, qysqa arnalǵan eginge, jazdyq eginge de keri áser etedi. Sý kúshi azaıǵandyqtan, sýarý da qıyn bolady», - dep osyndaı kezeń kelgenin Ispanıa aýylsharýashylyq, balyq aýlaý jáne azyq-túlik mınıstri Lýıs Planas Pýchades málimdedi.
Brússeldegi mınıstrlik kezdesýinde Fransıa, Italıa men Ispanıanyń atynan Portýgalıa usynǵan baıandama jaǵdaıdyń qıyn ekenin kórsetti. Sáýirdiń sońynda Eýroodaqtyń 21,6% aýmaǵy «qýańshylyq týraly eskertý» rejıminde, al 3,2%-i «dabyl» jaǵdaıynda boldy.
Jaýyn-shashynnyń bolmaýynan Ispanıa men Portýgalıa qatty shyǵynǵa batty. Baltyq pen Skandınavıa elderinde topyraqtaǵy ylǵal mólsheri ádettegiden azaıyp ketti.
Ispanıada 2022 jyldyń 1 qazany men 2023 jyldyń 25 sáýiri aralyǵynda jaýyn-shashyn jetispeýshiligi kólemi ortasha esepten 24%-ke tómendegen, al Fransıada 101 departamenttiń 26-y jaz sońynda qýańshylyqqa tap bolýy múmkin. Ol Portýgalıanyń 40%-ten astam qurlyq aýmaǵyndaǵy aýylsharýashylyǵy qyzmetine keri áser etti.
Italıada qýańshylyqpen qatar sý tasqyny da mal sharýashylyǵy, júzim ósirý, dándi daqyldar, jemis-jıdek óndirýge zıanyn tıgizip jatyr. Sonymen qatar ózen atyraýyndaǵy aǵynnyń azaıýy saldarynan teńizden tuzdy tanap kóterilip, sý aýylsharýashylyǵy qajeti úshin jaramsyz bolyp qalady.