Almaty ákimi Erbolat Dosaev saıası qýǵyn-súrgin qurbandaryn eske alý kúni 1931-33 jyldardaǵy asharshylyq qurbandaryna arnalǵan eskertkishke gúl shoqtaryn qoıýǵa qatysty, dep habarlaıdy Almaty-akshamy.kz.
Rásim Qaraǵaıly skverinde ótti. Oǵan qoǵam qaıratkerleri, qýǵyn-súrginge ushyraǵandardyń týystary men jaqyndary, jastar uıymdarynyń ókilderi jáne t. b. qatysty.
Eske alý is-sharasyna qatysýshylar qýǵyn-súrginge ushyraǵandardy bir mınýt únsizdikpen eske alyp, memorıalǵa gúl shoqtaryn qoıdy. Jınalǵandar búgingi tańda tarıhtyń aqtańdaq betterin umytpaý, Qazaqstannyń bostandyǵy men táýelsizdigi úshin qandaı qurbandyqtyń bolǵanyn jáne olardy ulyqtaý qanshalyqty mańyzdy ekenin atap ótti.
Túrli málimetter boıynsha, ótken ǵasyrdyń 30-shy jyldarynyń basynda 3 mln-ǵa jýyq qazaqstandyq jappaı asharshylyqtyń qurbany boldy, 100 myńnan astam adam qýǵyn-súrginge ushyrady, 25 myńnan astam adam atyldy.
Saıası qýǵyn-súrgin jáne asharshylyq qurbandaryn eske alý kúni Qazaqstanda 1997 jyldan beri atalyp keledi. Qýǵyn-súrginnen Qazaqstannyń kórnekti ǵylym jáne mádenıet qaıratkerleri - Ahmet Baıtursynov, Álıhan Bókeıhanov, Myrjaqyp Dýlatov, Muhamedjan Tynyshpaev, Maǵjan Jumabaev, Sáken Seıfýllın jáne basqalar zardap shekti.
Bul kúnderi qalada túrli estelik is-sharalar, sonyń ishinde «dóńgelek ústelder» formatyndaǵy konferensıalar, tarıhı-aǵartýshylyq dárister, teatrlandyrylǵan qoıylymdar, kitaphanalardaǵy foto jáne kitap kórmeleri, jastardyń zıaly qaýym ókilderimen kezdesýleri jáne t.b. uıymdastyrylady.
