Aýdandaǵy barlyq kóp qabatty úılerdiń jartysy eskirgen, bul qalanyń barlyq eski qorynyń 40%-in quraıdy.
Búgingi kúni jeke qurylys salýshylar 17 kóp páterli turǵyn úı salyp jatyr, olarǵa eski úılerdiń turǵyndary kóshiriledi, dep habarlaıdy Almaty-akshamy.kz.
Bul týraly Almaty ákimi Erbolat Dosaev Túrksib aýdany turǵyndarymen ótken kezdesýde aıtty.
«Osıpenko kóshesinde 59 páterlik 2 kóp páterli turǵyn úıdiń qurylysy aǵymdaǵy jyldyń sońyna deıin aıaqtalady. Onda biz Chernyshevskıı – Saýranbaev – Moldaǵalıev – Tolstoı kósheleriniń sharshysynda ornalasqan 4 eski úıdiń turǵyndaryn ýaqytsha kóshirmekpiz. Bul bizge kelesi jyly osy 4 úıdi buzyp, 214 páterlik 10 úıdiń qurylysyn bastaýǵa múmkindik beredi.
Osy kóshelerdiń sharshysynda 152 páterlik 7 kóp páterli turǵyn úı salynýda, onyń ishinde eski úılerdi jańartý baǵdarlamasy boıynsha 48 páter aınalymdaǵy turǵyn úıge arnalǵan. Bul úıler 2023 jylǵy mamyrda paıdalanýǵa beriledi. Atalǵan nysandar aıaqtalǵannan keıin biz Spartak, Aqyndar kóshesindegi taǵy 8 úıdiń turǵyndaryn kóshirýdi josparlap otyrmyz», - dedi qala ákimi Erbolat Dosaev.
Kassın, Kotelnıkov kósheleri, Seıfýllın dańǵylynyń sharshysynda 432 páterge 8 kóp páterli turǵyn úı qurylysy júrip jatyr. Úıler 2023 jyldyń shilde aıynda tapsyrylady. Onda atalǵan sharshydaǵy 15 eski úıdiń turǵyndary kóshiriledi.
Budan basqa, jeke qurylys salýshymen («Elif Construction» JSHS) «Altaı-2» shaǵynaýdanyndaǵy eki qabatty 57 úıdi renovasıalaý boıynsha memorandým jasaldy. Qonys aýdarýshylarǵa 456 páter beriledi. 2023 jyly İ kezeńde 18 eski úıdiń turǵyndaryn kóshirý úshin 2 turǵyn úı salynatyn bolady.
«Sonymen qatar, men aıtqan josparlardy iske asyrý eski úılerdiń barlyq 100% turǵyndarynyń kelisimimen ǵana múmkin bolatyndyǵyn qaıtalaǵym keledi», - dedi qala basshysy.