«Jol kartasy aıaqtaldy, biz oryndalýyn qadaǵalap jatyrmyz. Talaptardy oryndamaǵan bazarlar joıylady», -dedi Arman Shaqqalıev
Ol búginde bazarlarǵa qatysty suraqtar týyndap otyrǵanyn aıtty. Sonyń ishinde Almatynyń «Altyn Orda» bazarynda monıtorıńtik toptyń, Bas prokýratýranyń, İshki ister mınıstrliginiń qatysýymen kúrdeli tekserý júrip jatyr.
«Biz ár bazarmen osyndaı jumys isteımiz. Bazardyń jaǵdaıy baǵanyń kóterilýine jáne salyq salý bazasyna tikeleı jaýap beredi. Búginde atap aıtqanda, Almatyda 26 bazar jańǵyrtý jumystarynyń josparyna tartylǵan. Eń áýeli, bul bazarlarda baqylaý-kassalyq mashınalary, jalǵa berý kelisim-sharttaryn saqtaý, avtoturaqqa kirýden bastap túrli anyqtama berýge deıin qosymsha tólemderdi alyp tastaýǵa jaǵdaı jasalýy úshin aıtyp otyrmyz», -dedi Saýda jáne ıntegrasıa vıse-mınıstri.
Vıse-mınıstr depýtattardyń qoldaýynyń arqasynda 2022 jyly zań jobasy aıasynda prezıdenttiń jekelegen tapsyrmasymen kóterme saýda aımaǵyn bólshek saýda aımaǵynan bólý, qosymsha shyǵyndy alyp tastaý jáne saýda oryndaryn jalǵa berýdiń naqty mehanızmi týraly erejeniń bolýyn kózdeıtin ózgerister engizilgenin aıtty.
«Shymkentte de bazarlar týraly túsinik bar. Talapqa saı kelmeıtin birqatar bazar belgili. Olardy sáıkestendirýdiń merzimi men naqty sharalary qarastyrylǵan», -dedi A.Shaqqalıev úkimet saǵatynda.
2022 jyldyń aqpan aıynda Qasym-Jomart Toqaev «Altyn Orda» bazarynda tártip ornatýdy tapsyrdy. Sodan keıin ol «bul jer alypsatarlardyń yńǵaıly ortasyna aınalǵanyn» aıtty.
1 maýsymda Bas prokýratýra «Altyn Orda» bazarynyń qyzmetinde Qazaqstannyń 300-den astam zańnamasyn buzý faktisin anyqtady.
10 maýsymda «Altyn Orda» bazaryn úkimettik top táýlik boıy tekserip jatqany belgili boldy. Keıin Saýda mınıstrliginiń baılanys ortalyqtary men Telegram chattaryna «Altyn Orda» bazarynyń jumysyna qatysty 200-den astam shaǵym túskeni habarlandy.