19 jeltoqsan kúni senat depýtattary esirtki zattarynyń zańsyz aınalymyna qarsy is-qımyl boıynsha zańnamaǵa engizilgen túzetýlerdi maquldady. Bul ózgerister narkobıznes qurylymyndaǵy qarapaıym kýrerler men uıymdastyrýshylarǵa qatysty jazany aıqyndaýdy kózdeıdi: kýrerlerge jaza jeńildetilse, uıymdastyrýshylarǵa qatańdatylady.
Osy ýaqytqa deıin narkorynok oıynshylary arasynda naqty aıyrmashylyq jasalmaǵan. Sottar shaǵyn kólemde esirtki taratqan kýrerler men iri narkolaboratorıalardy basqaratyn qylmystyq top jetekshilerine birdeı qatań jaza taǵaıyndap kelgen. Mundaı tásil zań júıesiniń ádildigine qatysty suraqtar týyndatqan edi.
Endi zańnamaǵa engizilgen túzetýler aıasynda QR Qylmystyq kodeksiniń 297-babyna ózgerister engiziledi:
- Esirtki tasymaldaý, saqtaý nemese jiberý úshin burynǵydaı 10 jyl emes, 8 jylǵa deıin bas bostandyǵynan aıyrý jazasy taǵaıyndalady.
- İri kólemde esirtki taratqany úshin buryn 15 jyl jaza berilse, endi bul merzim 12 jylǵa deıin qysqarady.
Jaza jeńildegenimen, endi barlyq jaǵdaıda qosymsha jaza retinde múlikti tárkileý engiziledi. Buryn sotta múliktiń qylmystyq jolmen tabylǵany dáleldengen jaǵdaıda ǵana tárkileý júzege asyrylsa, endi bul talap avtomatty túrde oryndalady.
Polısıa qyzmetkerlerine bul ózgerister tergeý amaldaryna qosymsha júkteme túsirýi múmkin. Endi múlikti tárkileý jáne árbir isti jańa erejelerge sáıkes keltirý úshin naqty dáleldemeler jınaý qajet. Bul proses qylmystyq isterdiń sapaly qaralýyn talap etedi.
Jazany jeńildetý bir jaǵynan zań júıesin ádiletti etýge qadam bolsa, ekinshi jaǵynan múlikti tárkileý tárizdi qosymsha sharalar arqyly esirtki bıznesine tosqaýyl qoıýdy kózdeıdi. Bul ózgerister sot júıesine ǵana emes, quqyq qorǵaý organdaryna da jańa mindetter júktep otyr. Endi osy reformalardyń naqty nátıjesin ýaqyt kórsetedi.