İİM esirtki qylmysyna qarsy is-qımyl departamenti Astana jáne Aqmola oblysyndaǵy áriptesterimen birge 2023 jyldyń tamyz aıynda sıntetıkalyq esirtki óndirisin uıymdastyrǵan birneshe sheteldiktiń qylmystyq áreketine tosqaýyl qoıdy.
Tártip saqshylarynyń kásibıliginiń arqasynda esirtki zerthanasy áshkerelenip, zańsyz aınalymǵa 40 kg-nan astam “sıntetıka” jiberilmedi, dep habarlaıdy aqshamnews.kz Polisia.kz-ke silteme jasap.
Kúdiktiler Qazaqstanǵa esirtki óndirisin uıymdastyrý úshin kelgen. Sonymen qatar Astanada esirtki ótkizý arnasyn jolǵa qoımaq bolǵan. Aldymen elge qylmystyq bıznesti uıymdastyrýshy keldi. Ol elordada páterdi jalǵa alyp, esirtki zerthanasyn iske qosýǵa daıyndalǵan. Arnaıy maqsatta Aqmola oblysy Ereımentaý qalasynyń shetinde úı alynǵan. Qazaqstanǵa shetelden keletin sybaılastary úshin avtokólik te satyp alǵan.
Uıymdastyrýshy barlyq qajetti jabdyqtar men prekýrsorlarǵa esirtki óndirisine mashyqtanǵan saıttar arqyly tapsyrys bergen. Olar kontrabandalyq jolmen jetkizilgen. Dál osy kezeńde qaskóıler polısıanyń nazaryna ilikti. Sot ustalǵandardy QR QK-niń 264-babynyń 1-bóligi (Transulttyq uıymdasqan top qurý jáne oǵan basshylyq etý), 28-babynyń 3-bóligi, 297-babynyń 4-bóligi (Esirtki zattaryn ótkizý maqsatynda zańsyz daıyndaýǵa, qaıta óńdeýge, saqtaýǵa, tasymaldaýǵa qatysý) boıynsha kináli dep tanydy.
Uıymdastyrýshyǵa 23 jylǵa bas bostandyǵynan aıyrý jazasy taǵaıyndaldy. Onyń sybaılastary 21 jáne 22 jylǵa bas bostandyǵynan aıyryldy. Bıyl 38 esirtki zerthanasy joıyldy, onyń ishinde 24-i sıntetıkalyq esirtki óndirisi boıynsha. 183 keliden astam “sıntetıkalyq” esirtki, jarty tonnadan astam prekýrsor tárkilendi. Uıymdasqan qylmystyq top qurý jáne oǵan basshylyq etý faktileri boıynsha 11 qylmystyq is qozǵaldy.