QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda osy jyldyń qańtar-mamyr aılaryndaǵy Qazaqstannyń áleýmettik-ekonomıkalyq damýy jáne respýblıkalyq búdjettiń atqarylý qorytyndylary qaraldy,dep habarlaıdy Almaty-akshamy.kz.
Esepti kezeńde respýblıka ekonomıkasy 4,5%-ǵa ósti.
Bes aıdyń qorytyndysy boıynsha óńdeý ónerkásibi salalary respýblıka ekonomıkasynyń ósýine negizgi úlesti qosyp otyr.
Atap aıtqanda, mashına jasaýda – 32%, onyń ishinde avtomobıl jasaýda – 41%, sondaı-aq jeńil ónerkásipte – 31% ósý dınamıkasy tirkeldi. Negizgi kapıtalǵa salynǵan ınvestısıanyń ósý qarqyny 17,2%-dy qurady. Jalpy esepti kezeńde barlyq negizgi makrokórsetkishterdiń ósimi Abaı, Aqmola, Batys Qazaqstan, Qostanaı, Pavlodar, Soltústik Qazaqstan, Ulytaý oblystary men Almaty qalasynda tirkeldi. Eń tómen kórsetkishter Atyraý jáne Almaty oblystarynda. Úkimet basshysy atap ótkendeı, halyqaralyq qarjy ınstıtýttary álemdik ekonomıkanyń ósý boljamdaryn 2 esege jýyq azaıtty.
«Alaıda, syrtqy faktorlarǵa qaramastan, biz makroekonomıkalyq turaqtylyqty saqtap qana qoımaı, ekonomıkanyń ósý qarqynyn qamtamasyz etýimiz kerek. Bazalyq salalardy sapaly damytýǵa barynsha kóńil bólip, eńbek kiristeriniń ósýi, sapaly jumys oryndaryn qurý esebinen azamattardyń ál-aýqatyn arttyrý jóninde belsendi sharalar qabyldanýy tıis», - dedi Álıhan Smaıylov.
Bul rette Premer-Mınıstr qarjylyq tártipti kúsheıtý mańyzdy ekenin atap ótti, óıtkeni baǵdarlamalardyń birqatar ákimshileri búdjet qarajatyn ıgermegen. Osyǵan baılanysty eń úlken áleýmettik-ekonomıkalyq nátıjege qol jetkizý úshin búdjet parametrleriniń saqtalýyn jáne qarajattyń tıimdi bólinýin qamtamasyz etý qajet.
«Turǵyn úı-kommýnaldyq sharýashylyq ınfraqurylymyn jóndeý jáne rekonstrýksıalaý boıynsha josparlanǵan ınvestısıalyq is-sharalardyń oryndalýy erekshe baqylaýda bolýy tıis. Áleýmettik-ekonomıkalyq damýdyń barlyq josparlanǵan kórsetkishterine qol jetkizý kerek», - dep qorytyndylady sózin Álıhan Smaıylov.